Views: 1
ប្រែសម្រួល : កញ្ញាដាលីស (ដេល្លីម៉េល) ៖ ម្ចាស់ Twitterលោក អ៊ីឡុន ម៉ាស កាលពីថ្ងៃចន្ទទី២៨វិច្ឆិកាបានបើកការបាញ់ប្រហារលើក្រុមហ៊ុន Appleជុំវិញការគ្រប់គ្រងដ៏តឹងរ៉ឹងរបស់ខ្លួនចំពោះអ្វីដែលត្រូវបានអនុញ្ញាតនៅលើ App Store ដោយនិយាយថា ក្រុមហ៊ុនផលិត iPhone នេះបានគំរាមដកកម្មវិធីបណ្តាញសង្គមដែលគាត់ទើបទិញថ្មីៗនេះ។
លោកម៉ាសក៏បានចូលរួមតវ៉ាផងដែរជុំវិញថ្លៃសេវា ៣០ ភាគរយដែលក្រុមហ៊ុន Apple ប្រមូលលើប្រតិបត្តិការតាមរយៈ App Store របស់ខ្លួនដែលជាច្រកផ្លូវតែមួយគត់សម្រាប់កម្មវិធីនានាអាចចូលទៅកាន់ឧបករណ៍ចល័តរាប់ពាន់លានគ្រឿងរបស់ខ្លួន។
សារ Twitterជាហូរហែ ដែលបណ្តេញចេញដោយលោកម៉ាស គឺរួមមានរូបភាពចម្អកឡកឡឺយនៃរថយន្តមួយដែលមានឈ្មោះត្រកូលរបស់គាត់នៅលើវា ដែលកំពុងធ្វើដំណើរទៅកាន់ផ្លូវហាយវេ ដែលមានស្លាក “ទៅធ្វើសង្គ្រាម” ជំនួសឱ្យការបន្តដំណើរឆ្ពោះទៅរកការ “បង់ប្រាក់ ៣០%”។
នាយកប្រតិបត្តិមហាសេដ្ឋីរូបនេះក៏បានសរសេរលើ Twitter ដែរថា ក្រុមហ៊ុន Appleបានគំរាមដកកម្មវិធី Twitter ពី App Store របស់ខ្លួន ប៉ុន្តែមិនបានប្រាប់យើងពីមូលហេតុទេ។
ក្រុមហ៊ុន Apple មិនបានឆ្លើយតបភ្លាមៗចំពោះសំណើសុំបំភ្លឺពីទីភ្នាក់ងារសារព័ត៌មាន AFP ទេ។
ទាំងក្រុមហ៊ុន Apple និង Google ទាមទារឱ្យសេវាកម្មបណ្តាញសង្គមនៅលើហាងកម្មវិធីរបស់ពួកគេឱ្យមានប្រព័ន្ធមានប្រសិទ្ធភាពសម្រាប់ធ្វើអន្តរាគមន៍លើមាតិកាដែលបង្កគ្រោះថ្នាក់ឬបំពាន។
ប៉ុន្តែចាប់តាំងពីបានកាន់កាប់ Twitter កាលពីខែមុនមក លោកម៉ាសបានកាត់បន្ថយកម្លាំងការងាររបស់ Twitter ប្រហែលពាក់កណ្តាល រួមទាំងបុគ្គលិកជាច្រើនដែលទទួលបន្ទុកក្នុងការប្រយុទ្ធប្រឆាំងនឹងព័ត៌មានមិនពិត ខណៈបុគ្គលិកក្នុងចំនួនមិនស្គាល់ បានលាឈប់ពីការងារដោយស្ម័គ្រចិត្ត។
លោកក៏បានបើកឱ្យគណនីហាមឃាត់ពីមុនដំណើរការឡើងវិញផងដែរ រួមទាំងគណនីរបស់អតីតប្រធានាធិបតី ដូណាល់ ត្រាំ៕
លោកម៉ាសសរសេរពាក្យ “ទៅធ្វើសង្គ្រាម” នៅលើរូបភាពឡានមួយក្នុងន័យបើកសមរភូមិលើក្រុមហ៊ុន Apple ដែលគំរាមដក App របស់ Twitter ចេញពី App Store
