Views: 2
ប្រែសម្រួល : កញ្ញាដាលីស (ដេល្លីម៉េល) ៖ ក្រុមហ៊ុន Toyota Motor Corp បាននិយាយថា ខ្លួននឹងចាប់ផ្តើមការផលិតឡើងវិញនូវរថយន្តអគ្គិសនីដំបូងរបស់ខ្លួនគឺ រថយន្ត bZ4Xនៅថ្ងៃព្រហស្បតិ៍ទី៦តុលានេះ បន្ទាប់ពីបានដោះស្រាយបញ្ហាសុវត្ថិភាពដែលអាចកើតមាន ដែលបានបញ្ឈប់ការលក់រថយន្តម៉ូដែលថ្មីប្រើថាមពលអាគុយអស់រយៈពេលជាង ៣ ខែ។
ក្រុមហ៊ុនផលិតរថយន្តធំជាងគេរបស់ជប៉ុន ដែលជាក្រុមហ៊ុនយឺតយ៉ាវក្នុងទីផ្សារ EV បានប្រមូលមកវិញនូវរថយន្ត bZ4X ចំនួន ២.៧០០ គ្រឿងនៅទូទាំងពិភពលោកក្នុងខែមិថុនាបន្ទាប់ពីបានរកឃើញថាមានហានិភ័យដែលកង់រថយន្តអាចរលុង។
ក្រុមហ៊ុន Subaru Corp ដែលជាក្រុមហ៊ុនទី ៥ កាន់កាប់ដោយ Toyota ក៏ប្រមូលមកវិញនូវរថយន្តម៉ូដែលពាក់ព័ន្ធ Solterra ដែលខ្លួនបានអភិវឌ្ឍរួមគ្នាជាមួយ Toyota ផងដែរ។
សេចក្តីជូនដំណឹងអំពីការប្រមូលរថយន្តមកវិញ ដែលបានដាក់ជូនក្រសួងដឹកជញ្ជូនរបស់ជប៉ុនដោយក្រុមហ៊ុន Toyota កាលពីខែមិថុនា បាននិយាយថាការបត់លឿនៗនិងការចាប់ហ្វ្រាំងភ្លាមៗអាចបណ្តាលឱ្យរលុងប៊ូឡុង ដែលបង្កើនហានិភ័យនៃការរបូតកង់ចេញពីរថយន្ត។
ក្រុមហ៊ុនផលិតរថយន្តនេះកាលពីថ្ងៃព្រហស្បតិ៍បាននិយាយនៅក្នុងឯកសារមួយទៅកាន់ក្រសួងថា ខ្លួននឹងធ្វើឱ្យប្រាកដថា ប៊ូឡុងត្រូវបានជំនួស និងរឹតតឹងបានយ៉ាងត្រឹមត្រូវនៅក្នុងកំណែថ្មីនៃរថយន្ត bZ4X ។
លើសពីនេះ Toyota ក៏បាននិយាយដែរថា ខ្លួនបានកំណត់និងដោះស្រាយបញ្ហាដែលអាចកើតមានជាមួយនឹងពោងសុវត្ថិភាពនៅក្នុងរថយន្ត។ ពោងសុវត្ថិភាពមួយចំនួនត្រូវបានដំឡើងមិនត្រឹមត្រូវនៅក្នុងរោងចក្រ ហើយមានហានិភ័យក្នុងការមិនបញ្ចេញពោងឬបណ្តាលឱ្យមានរបួសដោយសារតែការដាក់ខ្សែមួយនៅក្នុងផ្នែកដំឡើងពោងសុវត្ថិភាព៕
Toyota បានប្រមូលមកវិញនូវរថយន្ត bZ4X ចំនួន ២.៧០០ គ្រឿងនៅទូទាំងពិភពលោកក្នុងខែមិថុនា
