Views: 6
ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតីតួកគី លោក រីស៊ីប ថាយយីប អឺដូហ្គាន (Recep Tayyip Erdogan)បាននិយាយកាលពីថ្ងៃព្រហស្បតិ៍ទី៦តុលាថាមានភាពខុសប្លែកគ្នានៅក្នុងវិធីសាស្ត្ររបស់ស៊ុយអែតនិងហ្វាំងឡង់ ដើម្បីបំពេញតាមការទាមទារសន្តិសុខរបស់តួកគីសម្រាប់ពួកគេឱ្យចូលរួមជាមួយអង្គការណាតូ ដោយលើកឡើងថាពួកគេអាចចូលរួមនៅពេលវេលាដាច់ដោយឡែកពីគ្នា។
តួកគីបានគំរាមរារាំងសមាជិកភាពរបស់ស៊ុយអែតនិងហ្វាំងឡង់នៅក្នុងសម្ពន្ធភាពការពារជាតិដែលមានសមាជិកចំនួន៣០ នេះ ដោយចោទប្រកាន់រដ្ឋាភិបាលក្រុងស្តុកខុល និងរដ្ឋាភិបាលក្រុងហែលស៊ីនគីថាបានគាំទ្រក្រុម ដែលរដ្ឋាភិបាលក្រុងអង់ការ៉ាចាត់ទុកជាភេរវករ។
អង្គការណាតូដំណើរការដោយការឯកភាពគ្នា ហើយប្រទេសតំបន់ន័រឌីក (Nordic)ទាំងពីរត្រូវការការយល់ព្រមពីតួកគីដើម្បីចូលរួម។សភារបស់តួកគីនិងហុងគ្រីនៅមិនទាន់បានផ្តល់សច្ចាប័នលើការចូលជាសមាជិករបស់ពួកគេនៅឡើយទេ។
លោកអឺដូហ្គានបាននិយាយនៅក្នុងសន្និសីទសារព័ត៌មានមួយនៅឯកិច្ចប្រជុំកំពូលបើកឆាកនៃសហគមន៍នយោបាយអឺរ៉ុបថា “ដរាបណាអង្គការភេរវករកំពុងបង្ហាញខ្លួនពេញផ្លូវនៃប្រទេសស៊ុយអែត ហើយដរាបណាពួកភេរវករកំពុងស្ថិតនៅក្នុងសភាស៊ុយអែត នោះនឹងមិនមានវិធីសាស្ត្រវិជ្ជមានពីតួកគីឆ្ពោះស៊ុយអែតនោះទេ”។
ទោះយ៉ាងណា លោកអឺដូហ្គានបាននិយាយថា ជំហររបស់តួកគីចំពោះហ្វាំងឡង់គឺមានភាពវិជ្ជមានជាង។
លោកអឺដូហ្គានបាននិយាយថា “ទំនាក់ទំនងជាមួយហ្វាំងឡង់មានលក្ខណៈខុសប្លែកគ្នាជាងទំនាក់ទំនងរវាងស៊ុយអែតនិងតួកគី។ ហ្វាំងឡង់មិនមែនជាប្រទេសដែលភេរវករដើរហើរដោយសេរីនោះទេ”។
មេដឹកនាំតួកគីបានបន្ថែមថា “អង្គការណាតូនឹងត្រូវធ្វើការសម្រេចចិត្ត ហើយប្រសិនបើពួកគេធ្វើការសម្រេចចិត្តដែលគាំទ្រហ្វាំងឡង់ពិតណាស់យើងនឹងធ្វើអ្វីគ្រប់យ៉ាងដែលយើងតម្រូវឱ្យធ្វើ”។
នាយករដ្ឋមន្ត្រីហ្វាំងឡង់លោកស្រី សានណា ម៉ារីន (Sanna Marin) បាននិយាយថា រដ្ឋាភិបាលក្រុងហែលស៊ីនគីគាំទ្រការចូលរួមសម្ពន្ធភាពយោធានេះក្នុងពេលតែមួយជាមួយស៊ុយអែត។
លោកស្រីបាននិយាយថា “តាមទស្សនៈរបស់យើង វានឹងមានសារៈសំខាន់ខ្លាំងណាស់ដែលហ្វាំងឡង់និងស៊ុយអែតចូលរួមអង្គការណាតូជាមួយគ្នា ពីព្រោះយើងទាំងពីរនៅភាគខាងជើងនៃទ្វីបអឺរ៉ុប ប្រទេសទាំងពីរគឺស្ថិតនៅក្នុងទីតាំងភូមិសាស្ត្រនយោបាយសន្តិសុខដូចគ្នា”។
លោកស្រីម៉ារីនបានបន្ថែមថា “ប៉ុន្តែជាការពិតណាស់ យើងនឹងបន្តការពិភាក្សា ហើយឥឡូវនេះវាអាស្រ័យលើតួកគីនិងហុងគ្រីក្នុងការសម្រេចចិត្តសម្រាប់ការផ្តល់សច្ចាប័ន”៕
ប្រធានាធិបតីតួកគី លោក រីស៊ីប ថាយយីប អឺដូហ្គាន