Views: 1
ប្រែសម្រួល : កញ្ញាដាលីស (ស្ត្រេតថែមស៍) ៖ ប្រធានទីប្រឹក្សារបស់ប្រធានាធិបតីតួកគីបានប្រាប់សមភាគីអាម៉េរិកថា តួកគីចង់បាន “ជំហានរឹងមាំ” លើអត្ថិភាពនៃអ្វីដែលខ្លួនហៅថា “អង្គការភេរវករ” នៅក្នុងប្រទេសហ្វាំងឡង់និងស៊ុយអែត មុនពេលដែលខ្លួននឹងពិចារណាការសុំចូលជាសមាជិកអង្គការណាតូរបស់ពួកគេ។
ប្រធានាធិបតីតួកគីបាននិយាយនៅក្នុងសេចក្តីថ្លែងការណ៍មួយថា ទីប្រឹក្សាសន្តិសុខជាតិអាម៉េរិកលោក ជែក ស៊ូលលីវ៉ាន់ (Jake Sullivan) និងលោក អ៊ីប្រាហ៊ីម កាលីន (Ibrahim Kalin) ជាប្រធានទីប្រឹក្សាគោលនយោបាយការបរទេសរបស់ប្រធានាធិបតី ថាយយីប អឺដូហ្គាន កាលពីថ្ងៃចន្ទ ទី៣០ ឧសភា បានពិភាក្សាអំពីការសុំចូលជាសមាជិកណាតូនិងសង្គ្រាមនៅអ៊ុយក្រែន។
តួកគីបានជំទាស់នឹងប្រទេសទាំងពីរមិនឱ្យចូលរួមក្នុងសម្ពន្ធភាពការពារជាតិរបស់លោកខាងលិចក្រោមហេតុផលថាពួកគេបានរក្សាទុកមនុស្សដែលមានទំនាក់ទំនងជាមួយក្រុមសកម្មប្រយុទ្ធនៃគណបក្សពលករឃឺដ (PKK)និងអ្នកផ្សេងទៀតដែលខ្លួនចាត់ទុកថាជាភេរវករ ហើយដោយសារតែហ្វាំងឡង់ និងស៊ុយអែតបានបញ្ឈប់ការនាំចេញអាវុធទៅកាន់ប្រទេសតួកគីក្នុងឆ្នាំ ២០១៩។
នៅក្នុងសេចក្តីថ្លែងការណ៍មួយ ប្រធានាធិបតីតួកគីបាននិយាយថា លោកកាលីនបានប្រាប់លោកស៊ូលលីវ៉ាន់នៅក្នុងការហៅទូរស័ព្ទថា ប្រទេសដែលចង់ចូលរួមជាមួយណាតូត្រូវតែ”ផ្តល់តម្លៃនិងគោលការណ៍ផ្ទៃក្នុងរបស់សម្ពន្ធភាពនេះលើផ្នែកសន្តិសុខនិងការប្រឆាំងអំពើភេរវកម្ម”។
សេចក្តីថ្លែងការណ៍បានបន្ថែមថា “វាត្រូវបានសង្កត់ធ្ងន់ថាវាជាការចាំបាច់សម្រាប់ស៊ុយអែតនិងហ្វាំងឡង់ចាត់វិធានការរឹងមាំទាក់ទងនឹងអង្គការភេរវករដែលគំរាមកំហែងដល់សន្តិសុខជាតិរបស់តួកគី”។
សេតវិមានបាននិយាយថា លោកស៊ូលលីវ៉ាន់នៅក្នុងការហៅទូរស័ព្ទនេះ”បានសម្តែងការគាំទ្រចំពោះការបន្តកិច្ចពិភាក្សាផ្ទាល់របស់តួកគីជាមួយស៊ុយអែតនិងហ្វាំងឡង់ដើម្បីដោះស្រាយកង្វល់ជុំវិញការដាក់ពាក្យសុំចូលជាសមាជិកណាតូ ដែលសហរដ្ឋអាម៉េរិកគាំទ្រយ៉ាងខ្លាំង”៕
លោក អ៊ីប្រាហ៊ីម កាលីន ប្រធានទីប្រឹក្សាគោលនយោបាយការបរទេសរបស់ប្រធានាធិបតី ថាយយីប អឺដូហ្គាន
