Views: 7
ប្រែសម្រួល : កញ្ញាដាលីស (ដេល្លីម៉េល) ៖ ចៅក្រមសហព័ន្ធរបស់សហរដ្ឋអាម៉េរិកកាលពីថ្ងៃអង្គារទី៦ធ្នូបានច្រានចោលបណ្តឹងប្រឆាំងនឹងរជ្ជទាយាទអារ៉ាប៊ីសាអូឌីត ម៉ូហាម៉េត ប៊ីន សាល់ម៉ាន់ (Mohammed bin Salman) ក្នុងករណីសម្លាប់អ្នកកាសែតដែលមានមូលដ្ឋាននៅសហរដ្ឋអាម៉េរិក លោក ចាម៉ាល់ ខាសូកគី (Jamal Khashoggi)ដោយសុខចិត្តឱនក្បាលធ្វើតាមការទទូចរបស់រដ្ឋបាលបៃដិនថាព្រះអង្គម្ចាស់មានអភ័យឯកសិទ្ធិស្របច្បាប់ក្នុងសំណុំរឿងនេះ។
ចៅក្រមសង្កាត់កូឡំប៊ីនៃសហរដ្ឋអាម៉េរិក លោក ចន ឌី បេត (John D. Bates)បានស្តាប់តាមសំណើរបស់រដ្ឋាភិបាលអាម៉េរិកក្នុងការការពារព្រះអង្គម្ចាស់ម៉ូហាម៉េតពីបណ្តឹងនេះបើទោះបីជាលោកបេតបានហៅ “ការចោទប្រកាន់ជាប់ពាក់ព័ន្ធរបស់ទ្រង់ក្នុងការធ្វើឃាតលោកខាសូកគីគឺគួរឱ្យជឿជាក់” ក៏ដោយ។
មន្ត្រីអារ៉ាប៊ីសាអូឌីតមួយក្រុមបានសម្លាប់លោកខាសូកគីនៅក្នុងស្ថានកុងស៊ុលអារ៉ាប៊ីសាអូឌីតក្នុងទីក្រុងអ៊ីស្តង់ប៊ុលក្នុងឆ្នាំ ២០១៨។ លោកខាសូកគី ជាអ្នកសរសេរអត្ថបទរបស់កាសែត The Washington Post បានសរសេររិះគន់អំពីវិធីដឹកនាំដ៏ឃោរឃៅរបស់ព្រះអង្គម្ចាស់ម៉ូហាម៉េត ដែលជាអ្នកគ្រប់គ្រងពិតប្រាកដរបស់អារ៉ាប៊ីសាអូឌីត។
សហគមន៍ស៊ើបការណ៍សម្ងាត់អាម៉េរិកបានសន្និដ្ឋានថា ព្រះអង្គម្ចាស់អារ៉ាប៊ីសាអូឌីតអង្គនេះបានបញ្ជាឱ្យធ្វើប្រតិបត្តិការសម្លាប់លោកខាសូកគី។ការសម្លាប់នេះបានបើកកាយការប្រេះឆារវាងរដ្ឋបាលបៃដិននិងអារ៉ាប៊ីសាអូឌីត ដែលរដ្ឋបាលបៃដិនបានព្យាយាមបិទក្នុងប៉ុន្មានខែថ្មីៗនេះខណៈសហរដ្ឋអាម៉េរិកមិនបានជោគជ័យក្នុងការជំរុញឱ្យរាជាណាចក្រនេះលុបចោលការកាត់បន្ថយផលិតកម្មប្រេងនៅក្នុងទីផ្សារពិភពលោក ដែលអង្រួនដោយសង្គ្រាមអ៊ុយក្រែន។
រំលឹកថា លោកខាសូកគីបានចូលទៅក្នុងស្ថានកុងស៊ុលអារ៉ាប៊ីសាអូឌីតដើម្បីទទួលយកឯកសារចាំបាច់សម្រាប់អាពាហ៍ពិពាហ៍នាពេលខាងមុខរបស់គាត់។ គូដណ្តឹងរបស់គាត់ឈ្មោះ ហាទីស សេនជីស (Hatice Cengiz) ដែលបានរង់ចាំដោយមិនដឹងខ្លួននៅខាងក្រៅស្ថានកុងស៊ុលខណៈគាត់ត្រូវបានសម្លាប់ និងអង្គការសិទ្ធិមនុស្សមួយ ដែលបង្កើតឡើងដោយលោកខាសូកគីមុនពេលគាត់ស្លាប់ បានដាក់ពាក្យបណ្ដឹងនេះ។ បណ្ដឹងនេះក៏បានចុចចំឈ្មោះជំនួយការកំពូលពីររូបរបស់ព្រះអង្គម្ចាស់ថាជាអ្នកសមគំនិតផងដែរ។
រដ្ឋបាលបៃដិន បានប្រកាសកាលពីខែមុនថា ឋានៈរបស់ព្រះអង្គម្ចាស់ម៉ូហាម៉េតក្នុងនាមជានាយករដ្ឋមន្ត្រីអារ៉ាប៊ីសាអូឌីត បានផ្តល់អភ័យឯកសិទ្ធិអធិបតេយ្យភាពពីបណ្តឹងរបស់សហរដ្ឋអាម៉េរិក៕
ព្រះអង្គម្ចាស់ប៊ីនសាល់ម៉ាន់ស្វាគមន៍លោកបៃដិនមកកាន់អារ៉ាប៊ីសាអូឌីតកាលពីថ្ងៃទី១៥ កក្កដា ឆ្នាំ២០២២