Views: 11
ប្រែសម្រួល : កញ្ញាដាលីស (ដេល្លីម៉េល) ៖ តុលាការធម្មនុញ្ញរបស់ថៃគ្រោងនឹងប្រកាសសាលក្រមរបស់ខ្លួននៅថ្ងៃសុក្រទី៣០កញ្ញានេះលើសំណុំរឿងដែលកំណត់ថាតើនាយករដ្ឋមន្ត្រី ប្រាយុទ្ធ ចាន់អូចា បានកាន់តំណែងនាយករដ្ឋមន្ត្រីលើសឬមិនទាន់គ្រប់ដែនកំណត់រយៈពេលប្រាំបីឆ្នាំស្របតាមរដ្ឋធម្មនុញ្ញឬយ៉ាងណា។
លោកប្រាយុទ្ធ ដែលបានដណ្ដើមអំណាចនៅក្នុងរដ្ឋប្រហារឆ្នាំ ២០១៤ មុនពេលក្លាយជានាយករដ្ឋមន្ត្រីជាផ្លូវការភ្លាមៗនោះ ត្រូវបានព្យួរការងារកាលពីប្រាំសប្តាហ៍មុនខណៈតុលាការបានពិចារណាលើសំណុំរឿងដែលប្តឹងដោយគណបក្សភឿថៃ ដែលអះអាងថា លោកគួរតែចាកចេញពីតំណែងកាលពីខែមុន។
តុលាការត្រូវតែសម្រេចថាតើរយៈពេលប្រាំបីឆ្នាំនោះគួរតែរួមបញ្ចូលពេលវេលារបស់លោកប្រាយុទ្ធជាមេដឹកនាំរបបយោធាឬយ៉ាងណា បន្ទាប់ពីការផ្តួលរំលំរដ្ឋាភិបាលបក្សភឿថៃ។អ្នកគាំទ្ររបស់គាត់ខ្លះនិយាយថា រយៈពេលប្រាំបីឆ្នាំនោះគួរតែត្រូវរាប់បន្ទាប់ពីឆ្នាំ ២០១៧ នៅពេលដែលរដ្ឋធម្មនុញ្ញថ្មីចូលជាធរមាន ឬ សូម្បីចាប់ពីឆ្នាំ ២០១៩ នៅពេលដែលការបោះឆ្នោតត្រូវបានធ្វើឡើងហើយសភាថ្មីបានជ្រើសរើសគាត់ឱ្យដឹកនាំរដ្ឋាភិបាលចម្រុះ។
បញ្ហាអាណត្តិគឺជាកិច្ចប្រឹងប្រែងមួយក្នុងចំណោមកិច្ចប្រឹងប្រែងរបស់បក្សប្រឆាំងជាច្រើនដើម្បីដកឧត្តមសេនីយ៍ចូលនិវត្តន៍រូបនេះ រួមទាំងញ្ញត្តិបន្ទោសចំនួនបួនករណីជម្លោះផលប្រយោជន៍ជុំវិញការប្រើប្រាស់លំនៅដ្ឋានយោធាជាបន្តរបស់គាត់ និងការតវ៉ាជាច្រើនខែដែលប្រឆាំងនឹងការដឹកនាំរបស់គាត់និងរបបរាជានិយម។
យ៉ាងហោចណាស់ក្រុមប្រឆាំងរដ្ឋាភិបាលចំនួនពីរគ្រោងនឹងប្រមូលផ្តុំនៅសង្កាត់ពាណិជ្ជកម្មកណ្តាលទីក្រុងបាងកកនៅថ្ងៃសុក្រនេះនៅពេលតុលាការត្រៀមអានសាលក្រមរបស់ខ្លួន ខណៈប៉ូលិសនិយាយថា ប៉ូលិស ៣០០ នាក់នឹងត្រូវដាក់ពង្រាយជុំវិញតុលាការ។
អ្នកនាំពាក្យរដ្ឋាភិបាលលោក អានូចា ប៊ូរ៉ាផាឆៃស្រី (Anucha Burapachaisri) បានជំរុញឱ្យសាធារណជនគោរពសាលក្រម ដែលលោកនិយាយថានឹងជម្រះភាពមិនច្បាស់លាស់ទាំងឡាយ។
លោកអានូចានិយាយថា “នាយករដ្ឋមន្ត្រីត្រៀមខ្លួនជាស្រេចក្នុងការទទួលយកសាលក្រមពីតុលាការធម្មនុញ្ញទោះចេញមកបែបណាក៏ដោយ”។
ការបោះឆ្នោតអាចនឹងធ្វើនៅថ្ងៃទី ៧ ខែឧសភា ឆ្នាំក្រោយ នេះបើយោងតាមគណៈកម្មាធិការរៀបចំការបោះឆ្នោត ហើយការសម្រេចនៅថ្ងៃសុក្រនេះនឹងកំណត់ថាតើលោកប្រាយុទ្ធ អាយុ ៦៨ ឆ្នាំនឹងអាចស្វែងរកតំណែងនាយករដ្ឋមន្ត្រីម្តងទៀតឬអត់។
ប្រសិនបើតុលាការសម្រេចថាលោកប្រាយុទ្ធបានឈានដល់កាលកំណត់ប្រាំបីឆ្នាំកាលពីខែមុន សភាត្រូវតែជ្រើសរើសនាយករដ្ឋមន្ត្រីថ្មីពីបេក្ខជនដែលចាញ់ចំនួនប្រាំនាក់ពីការបោះឆ្នោតសភាឆ្នាំ ២០១៩។
លោក ទីទីប៉ូល ភក្តីវ៉ានិច (Titipol Phakdeewanich) ព្រឹទ្ធបុរសនៃមហាវិទ្យាល័យវិទ្យាសាស្ត្រនយោបាយនៃសាកលវិទ្យាល័យអ៊ូបុនរាជាធានី (Ubon Ratchathani) បាននិយាយថា “សាលក្រមរបស់តុលាការនឹងកំណត់អនាគតរបស់ប្រាយុទ្ធ។គណបក្សនយោបាយដែលត្រៀមចូលរួមការបោះឆ្នោតចង់ដឹងថាតើប្រាយុទ្ធនឹងអាចឈរឈ្មោះបានទៀតឬអត់”៕
សាលក្រមរបស់តុលាការនឹងកំណត់អនាគតរបស់ប្រាយុទ្ធនៅថ្ងៃសុក្រនេះ
