Views: 9
ប្រែសម្រួលៈបំណង(វ៉េអិនអិចស្ត្រេស)៖ ស្ត្រីម្នាក់ដែលបានវាយកូនស្រីរបស់សង្សារខ្លួនដល់ស្លាប់នៅក្នុងទីក្រុងហូជីមិញកាលពីឆ្នាំមុន ត្រូវបានកាត់ទោសប្រហារជីវិតកាលពីថ្ងៃសុក្រទី២៥វិច្ឆិការនៅពេលឪពុករបស់ក្មេងស្រីអាយុ៨ឆ្នាំរូបនេះជាប់គុកប្រាំបីឆ្នាំ។
តុលាការទីក្រុងហូជីមិញបានផ្តន្ទាទោស ង្វៀន វ៉ូ គីញ ចាង(Nguyen Vo Quynh Trang)អាយុ២៧ឆ្នាំដល់ស្លាប់ចំពោះឃាតកម្មលើកកុមារដ៏ព្រៃផ្សៃ នៅពេលសង្សាររបស់នាងដែលត្រូវជាឪពុកក្មេងស្រី លោកង្វៀន គីម ជុង ថាយ (Nguyen Kim Trung Thai)អាយុ៣៦ឆ្នាំ ទទួលទោសជាប់គុកបីឆ្នាំចំពោះការធ្វើទារុណកម្មនិងប្រាំឆ្នាំចំពោះការបិទបាំងឧក្រិដ្ឋកម្មនេះ។
ង្វៀន វ៉ូ គីញ ចាង និងសង្សារលោកង្វៀន គីម ជុង ថាយ ក្នុងតុលាការក្រុងហូជីមិញកាលពីថ្ងៃ២៥វិច្ឆិកា
អង្គចៅក្រមបាននិយាយថាច្បាប់មិនអនុញ្ញាតអោយនរណាវាយធ្វើបាបមនុស្សទេ ជាពិសេសកូនក្មេង។ដោយសារគ្រួសាររបស់ថាយមិនយល់ព្រមអោយខ្លួនរៀបការជាមួយនាងចាងនិងមានកូនជាមួយគ្នា នាងបានបញ្ចេញកំហឹងដាក់កូនស្រីរបស់របស់ថាយ។អំពើរបស់ចាងគ្រោះថ្នាក់ វាប្រឆាំងនឹងកុមារនិង«មានចេតនាអប្រិយខ្លាំង»។
សវនាការលើនាងចាងនិងថាយ បានទាក់ទាញការចាប់អារម្មណ៍ជាខ្លាំងក្នុងចំណោមសាធារណជនវៀតណាម។តុលាការក្រុងហូជីមិញបានរៀបចំកៅអី៣០០សំរាប់សាធារណជនចូលអង្គុយស្តាប់ការកាត់ក្តី តែចំនួនមនុស្សចង់ចូលរួមមានច្រើនជាងនេះ រួមទាំងអ្នកធ្វើដំណើរមកពីក្រៅក្រុងផងដែរ។
ប្រជាជនឈរនៅក្រៅតុលាការប្រជាជនក្រុងហូជីមិញដើម្បីតាមដានសវនាការកាលពីថ្ងៃ២៥វិច្ឆិកា
ប៉ូលិសបានបញ្ជូននិងដាក់ពង្រាយសន្តិសុខជុំវិញតុលាការ ព្រមទាំងបិទផ្លូវទៀតផងកាលពីថ្ងៃសុក្រ។
សូមបញ្ជាក់ថា ចាងនិងថាយបានរស់នៅជាមួយគ្នាអស់ពេលមួយឆ្នាំចាប់តាំងពីពេលថាយលែងប្រពន្ធនៅឆ្នាំ២០២០។ចាប់តាំងពីពេលនោះនាងតែងវាយធ្វើបាបក្មេងស្រីតូចនេះនិងបង្ខំអោយនាងធ្វើការងារផ្ទះ។ពេលរំពាត់ខូចដោយសារវាយញឹកញាប់ពេក នាងចាងបានប្រើដំបងឈើជំនួស។
នៅថ្ងៃ២២ខែធ្នូឆ្នាំមុន ចាងបានវាយក្មេងស្រីនេះដល់សន្លប់។ក្មេងស្រីរងគ្រោះត្រូវបានប្រកាសថាស្លាប់ពេលបញ្ជូនដល់មន្ទីរពេទ្យ។
ដោយមានស្លាកស្នាមរបួសលើខ្លួន ក្រុមគ្រូពេទ្យបានទាក់ទងទៅប៉ូលិសមកធ្វើការស៊ើបអង្កេត៕