Views: 1
ប្រែសម្រួល : កញ្ញាដាលីស (បាល់ទាត់) ៖ រាត្រីថ្ងៃអង្គារនេះមានការប្រកួតបាល់ទាត់ក្របខ័ណ្ឌ Uefa Champions League រហូតដល់ទៅ ៨ គូ ដែលក្នុងនោះការប្រកួតគួរឱ្យកត់សម្គាល់ជាងគេគឺរវាង Inter Milan ប៉ះជាមួយ Barcelona ខណៈក្រុមមាន់ខ្នាយមាស Tottenham ត្រូវធ្វើដំណើរទៅអាល្លឺម៉ង់ដើម្បីប្រកួតជាមួយ Frankfurt។
ការព្យាករណ៍ ៖
– Frankfurt vs Tottenham
ទាំង Tottenham និង Frankfurt ត្រូវគេរំពឹងថានឹងទទួលបានសំបុត្រទៅវគ្គ១៦ក្រុមយ៉ាងងាយ ប៉ុន្តែរហូតមកទល់ពេលនេះវាហាក់ដូចជាមិនទំនងកើតឡើងងាយដូចការគិតនោះឡើយ។ ក្រុមទាំងពីរមានការចាប់ផ្តើមមិនល្អទេក្នុងយុទ្ធនាការរៀងៗខ្លួន ហើយកំពុងស្ថិតក្រោមសម្ពាធក្នុងពេលនេះដើម្បីធ្វើការកែប្រែឱ្យល្អប្រសើរឡើងវិញ។
Spurs បានចាប់ផ្តើមជាមួយនឹងជ័យជម្នះ ខណៈពួកគេបានកត់ត្រាពិន្ទុក្នុងលទ្ធផល ២-០ នៅលើទឹកដីខ្លួនឯងជាមួយនឹងក្រុម Marseille ។ ប៉ុន្តែបន្ទាប់មកពួកគេបានចាញ់ ២-០ នៅទឹកដីរបស់ Sporting ហើយនេះប្រាកដណាស់ជាបរាជ័យដែលមិននឹកស្មានដល់។
បច្ចុប្បន្ន ពួកគេឈរនៅលេខរៀងទី ២ ក្នុងតារាង ហើយកំពុងដេញតាមពីក្រោយចំនួន៣ពិន្ទុពីក្រោមក្រុមកំពូលតារាង។ លើសពីនេះ ក្រុម Sporting ដែលឈរនៅលេខរៀងទី ១ នឹងត្រូវប៉ះជាមួយក្រុម Marseille ដែលជាក្រុមបាតតារាង ហើយត្រូវគេរំពឹងថានឹងឈ្នះ។
នេះជាការគំរាមកំហែងដ៏ធំមួយសម្រាប់ Spurs ដែលសង្ឃឹមទទួលបានតំណែងកំពូលតារាង។ ដូច្នេះ ពួកគេត្រូវតែឈ្នះដាច់ខាតទោះក្នុងតម្លៃណាក៏ដោយនៅថ្ងៃអង្គារនេះ។
ទន្ទឹមនឹងនេះដែរ Frankfurt អាចជាម្ចាស់ជើងឯក Europa League ក៏ពិតមែន ប៉ុន្តែពួកគេលេងមិនបានល្អទេក្នុង UCL។
ពួកគេបានចាញ់ក្នុងការប្រកួតបើកឆាករបស់ខ្លួនទល់នឹង Sporting។ បរាជ័យនេះបានកើតឡើងសម្រាប់ក្រុមអាល្លឺម៉ង់នេះនៅក្នុងផ្ទះ ហើយពួកគេបានបណ្តោយឱ្យរបូតដល់ទៅ៣គ្រាប់។
ពួកគេពិតជាបានយកឈ្នះ ០-១ នៅក្រៅទឹកដីជាមួយនឹងក្រុមបាតតារាង Marseille នៅប្រកួតបន្ទាប់ ហើយនៅពេលនេះពួកគេក៏កំពុងដេញតាមពីក្រោយ៣ពិន្ទុពីក្រោមក្រុមកំពូលតារាងផងដែរ។
តាមមើលទៅ រំពឹងថានឹងមានការស៊ុតបាល់បញ្ចូលទីខ្ពស់នៅថ្ងៃអង្គារនេះនៅកីឡដ្ឋាន Deutsche Bank Park។
ក្រុមទាំងពីរមិនដែលជួបគ្នាទេ ហើយលទ្ធផលព្យាករណ៍យប់នេះគឺ Spurs ឈ្នះក្នុងលទ្ធផល ២-១។
– Inter Milan vs Barcelona
Barcelona បានចាប់ផ្តើមយុទ្ធនាការអឺរ៉ុបរបស់ពួកគេជាមួយនឹងជ័យជម្នះធំលើក្រុម Plzen ប៉ុន្តែបន្ទាប់មកពួកគេបានចាញ់ក្រុម Bayern Munich បើទោះបីជាលេងល្អជាងនៅលើទីលានក៏ដោយ។ ពួកគេនឹងប្រឹងយកឈ្នះទោះក្នុងតម្លៃណាក៏ដោយនៅថ្ងៃអង្គារនេះ ប៉ុន្តែក្រុម Inter Milan នឹងខំប្រឹងមិនឱ្យគេឈ្នះងាយៗនោះឡើយ។
Inter បានចាញ់ ០-២ ក្នុងផ្ទះក្នុងការប្រកួតបើកឆាករបស់ពួកគេទល់នឹងក្រុម Bayern Munich ប៉ុន្តែបានកែស្ថានការណ៍វិញជាមួយនឹងជ័យជម្នះលើក្រុមបាតតារាង Plzen ។
ទម្រង់លេងជារួមរបស់ពួកគេមិនសូវល្អប៉ុន្មានទេនាពេលថ្មីៗនេះ។ ការប្រកួតថ្មីៗរបស់ពួកគេភាគច្រើនបានបញ្ចប់ដោយការចាញ់ ហើយពួកគេបានរបូតគ្រាប់បាល់ច្រើនៗផងដែរ។
កាលពីរដូវកាលមុន ពួកគេបានរបូតពានលីកទៅគូប្រជែង AC Milan ហើយបច្ចុប្បន្នពួកគេស្ថិតនៅលេខ៧ក្នុងតារាងលីកអ៊ីតាលី។ ពួកគេបានចាញ់ ៣ លើករួចមកហើយក្នុងចំណោមការប្រកួតលីកសរុបចំនួន ៧ លើករបស់ពួកគេមកទល់ពេលនេះ ហើយមានតែក្រុមមួយចំនួនតូចប៉ុណ្ណោះដែលរបូតគ្រាប់បាល់ច្រើនជាងពួកគេនៅក្នុងយុទ្ធនាការទាំងមូល។
ពួកគេកំពុងស្ថិតក្រោមសម្ពាធក្នុងការដណ្តើមយកជ័យជម្នះនៅថ្ងៃអង្គារនេះ ខណៈអនាគតនៃការប្រកួតជម្រុះរបស់ពួកគេកំពុងស្ថិតក្នុងមន្ទិល។
ទន្ទឹមនឹងនេះដែរ ក្រុមអ្នកមានបុណ្យ Barcelona កំពុងមានទម្រង់លេងដ៏អស្ចារ្យតាំងពីដើមរដូវកាលមក ហើយជាពិសេសគឺតំបន់ប្រយុទ្ធជួរមុខរបស់ពួកគេ។ អ្នកចាត់ការទូទៅលោក Xavi ហាក់អនុវត្តការរៀបចំយុទ្ធសាស្ត្រលេងរបស់គាត់យ៉ាងមានប្រសិទ្ធភាព ហើយកីឡាករហាក់យល់ច្បាស់អំពីទស្សនវិជ្ជាបាល់ទាត់របស់គាត់។
ពិតណាស់ ក្រុមអេស្ប៉ាញមានប្រៀបជាង Inter នៅថ្ងៃអង្គារនេះ ហើយរំពឹងឈ្នះខ្ពស់ជាងសម្រាប់ពួកគេ។
ទោះយ៉ាងណា Inter គឺជាម្ចាស់ផ្ទះ ហើយក្នុងពេលជាមួយគ្នានេះដែរ Barcelona កំពុងដោះស្រាយជាមួយបញ្ហារបួសខ្សែការពារសំខាន់ៗមួយចំនួន។
ជួបគ្នាចុងក្រោយបំផុតគឺ Barcelona ឈ្នះក្រៅទឹកដី ១-២។ ហើយគិតត្រឹម ៥ លើកចុងក្រោយ Barcelona ឈ្នះ Inter ៤ ដងទៅហើយ។ និយាយឱ្យខ្លី Inter ខានឈ្នះ Barcelona ក្នុងទឹកដីរបស់ខ្លួនអស់រយៈពេល១២ឆ្នាំមកហើយ។
លទ្ធផលព្យាករណ៍ Barcelona ឈ្នះ ៣-១៕
Barcelona រំពឹងឈ្នះយប់នេះនៅទឹកដី Inter
