Views: 3
ប្រែសម្រួល : កញ្ញាដាលីស (ដេល្លីម៉េល) ៖ វាលខ្សាច់អាតាកាម៉ា (Atacama)របស់ប្រទេសឈីលី គឺជាទេសភាពដ៏ព្រៃផ្សៃ ដែលបានក្លាយជាទីបញ្ចុះសពសម្រាប់សំរាមរបស់ពិភពលោក ហើយភ្នំសម្លៀកបំពាក់ រថយន្ត និងស្បែកជើងអាចរារាំងដល់ការរីកចម្រើនផ្នែកវិទ្យាសាស្ត្រនៅក្នុងលំហ។
នេះគឺជាតំបន់ស្ងួតបំផុតមួយរបស់ផែនដី ប៉ុន្តែអ្នកវិទ្យាសាស្ត្របានរកឃើញអតិសុខុមប្រាណដែលសម្របខ្លួនទៅនឹងពិភពគ្មានទឹក ដែលអាចផ្តល់តម្រុយអំពីរបៀបស្វែងរកជីវិតនៅលើភពស្រដៀងគ្នា ជាពិសេសភពព្រះអង្គារ។
ការស្រាវជ្រាវនេះកំពុងជួបគ្រោះថ្នាក់ ដោយសារតែវាលខ្សាច់អាតាកាម៉ាគឺជាមជ្ឈមណ្ឌលសម្រាប់សម្លៀកបំពាក់ជជុះនិងលក់មិនចេញពីសហរដ្ឋអាម៉េរិក អឺរ៉ុប និងអាស៊ី ដោយសម្លៀកបំពាក់ជាង ៤៦.០០០ តោនត្រូវបានបោះចោលនៅវាលខ្សាច់នេះកាលពីឆ្នាំមុន។
ឡានជជុះក៏ជន់លិចប្រទេសនេះពីតំបន់ពាណិជ្ជកម្មសេរីផងដែរដោយឥឡូវគរដូចភ្នំនៅវាលខ្សាច់នេះ ខណៈគំនរសំបកកង់ដែលគេបោះចោលបានរាយប៉ាយពាសពេញវាលខ្សាច់អាតាកាម៉ា។
លោក ផាទ្រីស៊ីអូ ហ្វើរេរ៉ា (Patricio Ferreira) អភិបាលទីប្រជុំជនវាលខ្សាច់ អាល់តូ ហូស្ពីស៊ីអូ (Alto Hospicio) បានប្រាប់ទីភ្នាក់ងារសារព័ត៌មាន AFP ថា “យើងមិនមែនគ្រាន់តែជាទីធ្លាចាក់សំរាមក្នុងស្រុកប៉ុណ្ណោះទេ ប៉ុន្តែជាទីធ្លាក់ចាក់សំរាមរបស់ពិភពលោក ដែលកាន់តែអាក្រក់ទៅៗ”។
វាលខ្សាច់អាតាកាម៉ាគឺស្ថិតនៅចន្លោះជួរភ្នំអានដេស (Andes) និងជួរភ្នំប៉ប្របឆ្នេរឈីលី ដែលបាំងសំណើមមិនឱ្យធ្វើដំណើរពីមហាសមុទ្រប៉ាស៊ីហ្វិក និងមហាសមុទ្រអាត្លង់ទិកចូលមកដីគោក។
ហើយទោះបីជាវាជាកន្លែងស្ងួតបំផុតមួយនៅលើផែនដីក៏ដោយ ក៏មនុស្សមួយលាននាក់បានហៅវាជាផ្ទះរបស់ពួកគេ។
ប៉ុន្តែវាលខ្សាច់អាតាកាម៉ាដ៏ធំរបស់ឈីលីគឺជាប្រព័ន្ធអេកូឡូស៊ីដ៏ពិសេសនិងផុយស្រួយ ដែលអ្នកជំនាញនិយាយថាកំពុងត្រូវបានគំរាមកំហែងដោយគំនរសំរាមដែលបានបោះចោលនៅទីនោះពីជុំវិញពិភពលោក។
ឧស្សាហកម្មម៉ូដសម្លៀកបំពាក់គឺជាពិរុទ្ធជនចម្បងចំពោះភ្នំសម្លៀកបំពាក់បោះចោល ដែលលាតសន្ធឹងពាសពេញតំបន់វាលខ្សាច់ហួតហែងនេះ។
សកម្មជននិយាយថា សារធាតុគីមីត្រូវចំណាយពេលរហូតដល់ ២០០ ឆ្នាំដើម្បីបំបែកជីវសាស្ត្រ ខណៈសម្លៀកបំពាក់គឺបំពុលដី ខ្យល់ និងទឹកក្រោមដី៕
វាលខ្សាច់អាតាកាម៉ា គឺជាកន្លែងបោះសំរាមរបស់ពិភពលោក