Views: 5
ដោយៈទេពកង្រី/កំពង់ឆ្នាំង: ថ្ងៃទី០៧ ខែធ្នូ ឆ្នាំ២០២២នេះ លោក ឡុង ឈុនឡៃ ប្រធានក្រុមប្រឹក្សាខេត្តកំពង់ឆ្នាំង និងលោក យិន សាវ៉េន អភិបាលរងខេត្តកំពង់ឆ្នាំង បានអញ្ជើញជាអធិបតីក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត ដែលធ្វើឡើងនៅក្រុងកំពង់ឆ្នាំង ខេត្តកំពង់ឆ្នាំង ។
ពិធីនេះមានការអញ្ជើញចូលរួមមានពីលោកស្រីសមាជិកាក្រុមប្រឹក្សាខេត្ត លោកនាយករដ្ឋបាលសាលាខេត្ត លោក លោកស្រីប្រធាន អនុប្រធានមន្ទីរ អង្គភាព ជុំវិញខេត្ត តំណាងកងកម្លាំងទាំង៣ ក្រុមប្រឹក្សាក្រុង ចៅសង្កាត់ មេភូមិ និងបងប្អូនប្រជាពលរដ្ឋសរុប ៩៣នាក់ ។
លោក យិន សាវ៉េន អភិបាលរងខេត្ត បានមានប្រសាសន៍ថា វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត បានផ្តល់ឱកាសដល់ក្រុមប្រឹក្សាគ្រប់ថ្នាក់ អ្នកពាក់ព័ន្ធ និងប្រជាពលរដ្ឋទាំងអស់អាចចូលរួមក្នុងការផ្តល់មតិយោបល់ចំពោះការអភិវឌ្ឍមូលដ្ឋាន សមិទ្ធផល បញ្ហាប្រឈម និងទិសដៅអនុវត្តនាពេលខាងមុខរបស់រដ្ឋបាលខេត្ត ផ្តល់នូវអនុសាសន៍ និងសំណូមពរនានា សម្រាប់ការពិភាក្សា និងតាមរយ:ការឆ្លើយតបបានទាន់ពេលវេលាពីស្ថាប័នជំនាញ និងកម្លាំងសមត្ថកិច្ចពាក់ព័ន្ធ ដើម្បីឈានទៅធ្វើការកែលម្អ និងដោះស្រាយឲ្យកាន់តែល្អប្រសើរស្របទៅនឹងតម្រូវការជាអាទិភាព និងការកាត់បន្ថយភាពក្រីក្រ ។
នៅក្នុងវេទិកាពិគ្រោះយោបល់ក្រុមប្រឹក្សានាពេលនេះ មានសំនួរ និងសំណូមពរផ្ទាល់មាត់មាន២ចំណុច និងសំនួរសំណូមពរជាលាយលក្ខណ៍អក្សរមាន១៩ចំណុច សរុប២១ ហើយដោះស្រាយបាន៦ចំណុច និងមិនទាន់ដោះ១៥ចំណុចបានប្រគល់ជូនអាជ្ញាធរ និងមន្ទីរជំនាញបន្តពិនិត្យដោះស្រាយពេលក្រោយ៕/R