Views: 4
ប្រែសម្រួល : កញ្ញាដាលីស (ដេល្លីម៉េល) ៖ គ្រីស្ទាណូ រ៉ូណាល់ដូត្រូវបានបន្ទាបឋានៈមកនៅត្រឹមតួនាទីជាកំពូលតារាបាល់ទាត់ ដែលគ្មាននរណាចង់បានបន្ទាប់ពីក្រុមជម្រើសជាតិព័រទុយហ្គាល់ធ្វើតាមលំនាំរបស់ក្រុមបិសាចក្រហម Manchester United ក្នុងការសម្រេចចិត្តថា ពួកគេប្រហែលជាល្អប្រសើរជាងបើគ្មានគាត់។
មែនហើយ ពួកគេពិតជាលេងល្អប្រសើរជាងមុនពេលគ្មានគាត់ ខណៈក្រុមជម្រើសជាតិព័រទុយហ្គាល់បានផ្តល់រង្វាន់ដល់ភាពក្លាហានរបស់គ្រូបង្វឹកលោក ហ្វើណង់ដូ សាន់តូស (Fernando Santos) ក្នុងការទម្លាក់និមិត្តរូបកីឡារបស់ប្រទេសគាត់ទៅអង្គុយកៅអីបម្រុង ជាមួយនឹងទម្រង់លេងបែបវាយលុកពេញទំហឹង និងចុងបញ្ចប់ទទួលជ័យជម្នះ ៦-១ លើស្វីស ដើម្បីឡើងទៅវគ្គ ១/៤ផ្តាច់ព្រ័ត្រវើលខាប់ជួបជាមួយម៉ារ៉ុក។
លោកសាន់តូសមិនគ្រាន់តែជម្រះអស់មន្ទិលសម្រាប់ការសម្រេចចិត្តរបស់គាត់ក្នុងការទម្លាក់រ៉ូណាល់ដូចេញពីជម្រើសដំបូងបន្ទាប់ពីបានរិះគន់ជាសាធារណៈនូវកាយវិការរបស់គាត់នៅពេលដែលគាត់ត្រូវបានប្តូរចេញនៅក្នុងការប្រកួតក្នុងពូលចុងក្រោយជាមួយកូរ៉េខាងត្បូងប៉ុណ្ណោះទេ គាត់ថែមទាំងត្រូវរង្វាន់ធំផងដែរខណៈអ្នកជំនួសវ័យក្មេងរបស់គាត់ គឺកីឡាករ ហ្គនកាឡូ រ៉ាម៉ូស (Goncalo Ramos) លេងល្អដូចផ្កានិងស៊ុតចូល៣គ្រាប់តែឯង។
វាជាពេលវេលាដ៏ជូរចត់មួយសម្រាប់មោទនភាពនិងអត្ដទន្ថភាពរបស់រ៉ូណាល់ដូវ័យ ៣៧ ឆ្នាំ ខណៈអាជីពរបស់គាត់នៅ Manchester United បានបញ្ចប់ដោយភាពជូរចត់បន្ទាប់ពីការរិះគន់ជាសាធារណៈលើក្លិប ហើយឥឡូវនេះព័រទុយហ្គាល់បានធ្វើរឿងមិននឹកស្មានដល់នៅ៣១ប្រកួតកន្លងមកនេះនិងនៅមុន Euro 2008ដោយបានដកគាត់ចេញពីជម្រើសដំបូងនៅក្នុងការប្រកួតដ៏សំខាន់បែបនេះ។
នេះពិតជាការសម្រេចចិត្តដ៏ក្លាហានបំផុតនិងធំបំផុតនៃការប្រកួតវើលខាប់នេះនិងក្នុងអំឡុងការកាន់តំណែងដឹកនាំរយៈពេលប្រាំបីឆ្នាំរបស់លោកសាន់តូសលើជម្រើសជាតិព័រទុយហ្គាល់៕
រ៉ូណាល់ដូបានត្រឹមអង្គុយកៅអីបម្រុងខណៈព័រទុយហ្គាល់លេងល្អដោយគ្មានគាត់