Views: 8
ប្រែសម្រួល : កញ្ញាដាលីស (បាល់ទាត់) ៖ សម្រាប់វើលខាប់ថ្ងៃនេះ ក្រុមទុយនីស៊ីមកពីអាហ្វ្រិកខាងជើងគឺមានប្រៀបជាងបន្តិចលើអូស្ត្រាលី ហើយពួកគេនឹងរំពឹងទទួលបានលទ្ធផលល្អនៅល្ងាចថ្ងៃសៅរ៍នេះ។ ទន្ទឹមនេះ អារ៉ាប៊ីសាអូឌីតរំពឹងលេងអស់ពីសមត្ថភាពដើម្បីបំបាក់ប៉ូឡូញ ឬអាចបានត្រឹមស្មើក៏ជាសមិទ្ធិផលធំសម្រាប់ក្រុមអាស៊ីមួយនេះដែរ។ ស្របពេលដូចគ្នានេះដែរ ក្រុមមាន់គកបារាំងនៅមិនទាន់មានលទ្ធភាពឈ្នះដាណឺម៉ាកនៅឡើយទេនៅជំនួប៣លើកចុងក្រោយនេះ ខណៈអាហ្សង់ទីនដាច់ខាតត្រូវតែយកឈ្នះលើម៉ិកស៊ិកឱ្យខាងតែបាន ពុំនោះទេនឹងវីវរហើយ។
– ទុយនីស៊ី vs អូស្ត្រាលី (ពូល D)
* ទុយនីស៊ីបានទប់ស្មើដាណឺម៉ាកក្នុងលទ្ធផល ០-០ ក្នុងការប្រកួតបើកឆាករបស់ពួកគេ ខណៈអូស្ត្រាលីចាញ់បារាំង ៤-១។
* ទុយនីស៊ីមាន Clean Sheet ៩ ដងក្នុង ១០ ប្រកួតចុងក្រោយរបស់ពួកគេ។
* កីឡាករ Ellyes Skhiri ស៊ុតបញ្ចូលទីបាន២គ្រាប់ក្នុងវគ្គជម្រុះវើលខាប់នៅអាហ្វ្រិក និងស៊ុតចំគោលដៅ២ជើងលើដាណឺម៉ាក។
ទុយនីស៊ីនិងអូស្ត្រាលីត្រូវជួបគ្នានៅថ្ងៃសៅរ៍នេះ ក្នុងអ្វីដែលមើលទៅដូចជាការប្រកួតត្រូវតែឈ្នះដាច់ខាតសម្រាប់ក្រុមទាំងពីរក្នុងពូល D។
ក្រុមកង់ហ្គូរូបានចាញ់បារាំងក្នុងលទ្ធផល ៤-១ ក្នុងការប្រកួតបើកឆាករបស់ពួកគេ ហើយត្រូវការលទ្ធផលដើម្បីរស់រាននៅវើលខាប់ ខណៈទុយនីស៊ីរកបាន១ពិន្ទុជាមួយនឹងក្រុមដាណឺម៉ាក ប៉ុន្តែដឹងថាពួកគេត្រូវប៉ះក្រុមមាន់គកបារាំងក្នុងការប្រកួតចុងក្រោយក្នុងពូលរបស់ពួកគេ។
ក្រុមអាហ្វ្រិកខាងជើងមួយនេះនិងក្រុមនៅមជ្ឈិមបូព៌ាភាគច្រើនធ្វើបានល្អក្នុងការប្រកួតវើលខាប់លើកដំបូងក្នុងពិភពអារ៉ាប់ ហើយទុយនីស៊ីបានបង្កការចាប់អារម្មណ៍ក្នុងការបើកឆាករបស់ពួកគេទល់នឹងដាណឺម៉ាក។ ឥន្ទ្រីដែកអាហ្វ្រិកប្រហែលជាពឹងលើសំណាងនៅពេលខ្លះ ប៉ុន្តែពួកគេពិតជាមានឱកាសឈ្នះផងដែរ ហើយអាចឈ្នះក្នុងការប្រកួតនៅថ្ងៃនេះក៏ថាបាន។
អូស្ត្រាលីបាននាំមុខបារាំងយ៉ាងភ្ញាក់ផ្អើល ប៉ុន្តែចាប់ពីចំណុចនោះតទៅ បារាំងលេងតែឯងលើទីលាន។ វាពិបាកក្នុងការវិនិច្ឆ័យពីរបៀបដែលក្រុមកង់ហ្គូរូលេងទល់នឹងគូប្រជែងប្រហាក់ប្រហែលគ្នា ដោយផ្អែកលើបរាជ័យក្រោមស្នាដៃបារាំង ប៉ុន្តែការលេងរបស់ទុយនីស៊ីទល់នឹងដាណឺម៉ាកបានបង្ហាញថា ពួកគេពិតជាអាចបង្កការភ្ញាក់ផ្អើលនៅកាតា ហើយមើលតាមហាងឆេង ពួកគេពិតជាក្រុមមានលទ្ធភាពខ្ពស់ក្នុងការដណ្តើមជ័យជម្នះនៅថ្ងៃសៅរ៍នេះ។
ទុយនេស៊ីអាចទប់ Clean Sheet ជាមួយដាណឺម៉ាក ហើយដូច្នេះពួកគេក៏អាចទប់មិនឱ្យអូស្ត្រាលីស៊ុតចូលផងដែរ។ គ្រូបង្វឹកលោក Jalel Kadri បានធ្វើឱ្យទុយនីស៊ីក្លាយជាក្រុមមានរបៀបល្អណាស់ ហើយពួកគេអាចរកបាន Clean Sheet ប្រាំបួនលើកក្នុង ១០ ប្រកួតចុងក្រោយរបស់ពួកគេ ដោយមានតែប្រេស៊ីលមួយគត់អាចស៊ុតចូលពួកគេ។
ទោះយ៉ាងណា ក្រុមអាហ្វ្រិកខាងជើងមួយនេះមិនមានប្រយុទ្ធមុតស្រួចពេកនោះទេ ហើយជ័យជម្នះ ២-០ លើអូស្ត្រាលីពិតជាលទ្ធភាពដែលអាចកើតឡើងនៅថ្ងៃនេះ។ កីឡាករ Ellyes Skhiri ត្រូវគេរំពឹងថាជាអ្នករកគ្រាប់បាល់ដំបូងឱ្យទុយនីស៊ីពេលប៉ះអូស្ត្រាលី។
– ប៉ូឡូញ vs អារ៉ាប៊ីសាអូឌីត (ពូល C)
* ប៉ូឡូញរបូតគ្រាប់បាល់នៅ៥ប្រកួតនៃការប្រកួត Nations League ចំនួន៦លើករបស់ពួកគេកាលពីដើមឆ្នាំនេះ។
* អារ៉ាប៊ីសាអូឌីតត្រូវគេស៊ុតចូល ៣ គ្រាប់តែ Offside ហើយពួកគេបានបង្កើតឱកាសស៊ុតជាច្រើនលើកផងដែរ។
* ប៉ូឡូញអនុញ្ញាតឱ្យម៉ិកស៊ិកស៊ុតលើទីខ្លួន១៣ជើងក្នុងការប្រកួតបើកឆាករបស់ពួកគេ។
បន្ទាប់ពីទទួលជ័យជម្នះ ២-១ លើក្រុមអាហ្សង់ទីនក្នុងការប្រកួតបើកឆាករបស់ពួកគេ ក្រសែភ្នែកទាំងអស់កំពុងផ្តោតលើអារ៉ាប៊ីសាអូឌីត។ ពួកគេឈរលេខ១ក្នុងពូល C បន្ទាប់ពីការប្រកួតជុំទីមួយ ដោយប៉ូឡូញបានត្រឹមស្មើពេលបើកឆាកទល់នឹងម៉ិកស៊ិក។ Robert Lewandowski និងមិត្តរួមក្រុមជួបការចាប់ផ្តើមដ៏លំបាក ដោយស៊ុតប៉េណាល់ទីមិនចូលនិងមិនអាចគ្រប់គ្រងការប្រកួតលើទីលានបាន។
សម្រាប់ការប្រកួតថ្ងៃនេះ ប៉ូឡូញគឺត្រូវឈ្នះជាដាច់ខាត ប៉ុន្តែអ្វីៗគ្រប់យ៉ាងសុទ្ធតែអាចប្រែប្រួល បន្ទាប់ពីជ័យជម្នះដ៏គួរឱ្យភ្ញាក់ផ្អើលរបស់អារ៉ាប៊ីសាអូឌីត។ អារ៉ាប៊ីសាអូឌីតមានឱកាសឡើងវគ្គ ១៦ ក្រុមចុងក្រោយដោយសារក្រុមទាំងបួនក្នុងពូលមានពិន្ទុក្រោមពួកគេ។ តើអារ៉ាប៊ីសាអូឌីតអាចរកជ័យជម្នះមួយទៀតដើម្បីកក់កៅអីទៅវគ្គបន្តបានដែរឬទេ?
Lewandowski នៅតែមិនទាន់អាចរកគ្រាប់បាល់បានក្នុងការបង្ហាញខ្លួនក្នុងវើលខាប់៤ដងមកនេះ ដោយមិនអាចរកគ្រាប់បាល់បានពីការស៊ុតចំគោលដៅ ១១ ជើងរបស់គេ រួមទាំងការខកខានស៊ុតបាល់ប៉េណាល់ទីមិនចូលផងដែរ។ វាពិតជាពិបាកក្នុងការគាំទ្ររូបគេស៊ុតចូលក្នុងប្រកួតនេះ បើទោះបីជាខ្សែការពារអារ៉ាប៊ីសាអូឌីតមើលទៅផុយស្រួយក៏ដោយ។
អាហ្សង់ទីនបានស៊ុតបាល់បញ្ចូលទីគ្រាប់ទីមួយនៅដើមការប្រកួតដំបូងរបស់ពួកគេ ហើយពួកគេបានស៊ុតបាល់បញ្ចូលទីបីគ្រាប់ទៀតតែជាបាល់អកហ្សឺ (Offside)។ អារ៉ាប៊ីសាអូឌីតលេងរប៉ាត់រប៉ាយនៅដើមទីដំបូង ដែលគួរតែបើកឱកាសសម្រាប់ប៉ូឡូញក្នុងការប្រកួតនេះ។ ខ្សែបម្រើ Piotr Zielinski របស់ Napoli រំពឹងរកបានគ្រាប់បាល់បាននៅចុងសប្តាហ៍នេះ ដោយសារតែរូបគេរកបានពីរគ្រាប់ចុងក្រោយសម្រាប់ក្លិប។ រូបគេស៊ុតបញ្ចូលទីក្នុងវគ្គជម្រុះវើលខាប់ និងក្នុង Nations League សម្រាប់ប្រទេសរបស់ខ្លួន ដូច្នេះរូបគេពិតជាមានភាគរយខ្ពស់ក្នុងការរកបានគ្រាប់បាល់។
ខណៈអារ៉ាប៊ីសាអូឌីតងាយរងគ្រោះក្នុងតំបន់ការពារ ពួកគេគួរតែអាចរកឃើញចន្លោះប្រហោងរបស់ប៉ូឡូញ។ ខណៈពួកគេទប់ស្មើម៉ិកស៊ិក ប៉ូឡូញបានរបូតគ្រាប់បាល់ក្នុងការប្រកួតចំនួន៥លើកនៃការប្រកួត Nations League ចំនួន៦លើករបស់ពួកគេនៅដើមរដូវកាលនេះ។ ក្នុងការប្រកួតជម្រុះវើលខាប់ បញ្ហាការពាររបស់ពួកគេក៏ត្រូវបានលាតត្រដាងនៅពេលពួកគេរបូតគ្រាប់បាល់ទល់នឹងក្រុមអន់អង់ដូរ៉ានិងសាន់ម៉ារីណូ។
អារ៉ាប៊ីសាអូឌីតដំបូងមិនសូវមានឱកាសច្រើនទេពេលជួបអាហ្សង់ទីន ប៉ុន្តែក្រោយរកបាន២គ្រាប់នៅដើមតង់ទីពីរ ពួកគេចាប់ផ្តើមបង្កើតឱកាសច្រើនឡើង។ ពួកគេថ្ងៃនេះពិតជាអាចបង្កបញ្ហាដល់ក្រុមប៉ូឡូញ ដែលបានអនុញ្ញាតឱ្យគេស៊ុតចំគោលដៅដល់ ១៣ ជើងនៅថ្ងៃប្រកួតបើកឆាក។ ទោះយ៉ាងណា ដោយហេតុថាអារ៉ាប៊ីសាអូឌីតក៏មានបញ្ហាខ្សែការពារ ដូច្នេះលទ្ធផល ១-១ ពិតជាអាចទៅរួចសម្រាប់គូមួយនេះ។
– បារាំង vs ដាណឺម៉ាក (ពូល D)
* ដាណឺម៉ាកស៊ុតបញ្ចូលទីក្នុង ១៨ ប្រកួតនៃ ២១ ប្រកួតចុងក្រោយរបស់ពួកគេ។
* បារាំងរបូតគ្រាប់បាល់ក្នុង ៦ ប្រកួតនៃ៧លើកចុងក្រោយរបស់ពួកគេ។
* ដាណឺម៉ាកមិនដែលចាញ់ក្នុងជំនួប៣លើកជាមួយបារាំង ហើយបានផ្តួលពួកគេ២ដងក្នុងរយៈពេលប្រាំមួយខែចុងក្រោយនេះ។
បារាំងបានតាមពីក្រោយជាមួយនឹងការវាយសម្រុកដ៏រំភើបទល់នឹងអូស្ត្រាលី ប៉ុន្តែពួកគេជួបគូប្រជែងស្វិតជាងមុនគឺដាណឺម៉ាកនៅថ្ងៃសៅរ៍នេះ។
មាន់គកបារាំងស្រឡាំងកាំងដោយគ្រាប់បាល់ដំបូងរបស់អូស្ត្រាលីត្រឹមតែ ៩ នាទី ប៉ុន្តែបានវាយបកឈ្នះវិញ ៤-១ តែទោះយ៉ាងណានោះគឺដោយសារខ្សែការពារអូស្ត្រាលីគ្មានគុណភាព ហើយការបាត់បង់កីឡាករជម្រើសដំបូង Lucas Hernandez ពិតជាក្តីកង្វល់ដ៏ធំសម្រាប់គ្រូបង្វឹកបារាំង Didier Deschamps ។
ដាណឺម៉ាកបានជួបការលំបាកក្នុងការបំបែករនាំងការពាររបស់ទុយនីស៊ី ប៉ុន្តែពួកគេគួរតែអាចទម្លុះសំណាញ់របស់បារាំង ដែលលេងតែប្រយុទ្ធមិនព្រមបិទ។
ក្រុមរបស់លោក Kasper Hjulmand បានចាញ់តែ២ប្រកួតប៉ុណ្ណោះក្នុងចំណោមការប្រកួត៨លើកចុងក្រោយរបស់ពួកគេ ពោលគឺចាញ់ក្រូអាស៊ីទាំងពីរប្រកួត និងបានផ្តួលម្ចាស់ជើងឯកវើលខាប់បារាំងពីរដងក្នុងរយៈពេលប្រាំមួយខែចុងក្រោយនេះ។
រំពឹងថាពួកគេនឹងធ្វើបានល្អម្តងទៀត ហើយអាចឈ្នះបារាំងក្នុងលទ្ធផលទស្សនទាយ ២-១។
– អាហ្សង់ទីន vs ម៉ិកស៊ិក (ពូល C)
* អាហ្សង់ទីនបានឈ្នះ ១៣ ប្រកួតក្នុងចំណោម ១៧ ប្រកួតចុងក្រោយរបស់ពួកគេ។
* ម៉ិកស៊ិកបានចាញ់ ៦ លើកក្នុងចំណោម ៧ លើកចុងក្រោយរបស់ពួកគេជាមួយអាហ្សង់ទីន ដោយរបូត ២០ គ្រាប់ និងស៊ុតចូលតែ ៤ គ្រាប់ប៉ុណ្ណោះ។
* Lionel Messi បានស៊ុតបញ្ចូលទី ១១ គ្រាប់ក្នុងការបង្ហាញខ្លួន ៥ លើកចុងក្រោយសម្រាប់អាហ្សង់ទីន។
អាហ្សង់ទីនបានរងបរាជ័យដ៏ខកចិត្តបំផុតក្នុងប្រវត្តិសាស្ត្របាល់ទាត់ពិភពលោកកាលពីថ្ងៃអង្គារ ខណៈពួកគេបានរងព្រនុងរបស់អារ៉ាប៊ីសាអូឌីត ២-១ នៅតង់ទីពីរ បន្ទាប់ពីស៊ុតចូល៣គ្រាប់មិនយកជាការ (Offside) ក្នុងតង់ទីមួយ។
ត្បិតដូច្នេះក្តី ពួកគេមានកីឡាករគុណភាពដើម្បីយកឈ្នះនៅថ្ងៃសៅរ៍នេះ ហើយអាហ្សង់ទីនពិតជាអាចធ្វើបានល្អទល់នឹងក្រុមវ័យចាស់ ម៉ិកស៊ិក។
មុនពេលចាញ់ដ៏គួរឱ្យភ្ញាក់ផ្អើល អាហ្សង់ទីនមិនស្គាល់ចាញ់សោះក្នុង ៣៦ ប្រកួត ហើយឈ្នះ ១៣ ប្រកួតក្នុងចំណោម ១៦ ប្រកួតចុងក្រោយរបស់ពួកគេ ចាប់តាំងពីការឈ្នះពានរង្វាន់ Copa America កាលពីឆ្នាំមុន ដោយស៊ុតបញ្ចូលទីបាន ៣៧ គ្រាប់ និងរបូតតែ ៣ គ្រាប់ប៉ុណ្ណោះ។
ការប្រកួតបើកឆាករបស់ម៉ិកស៊ិកគឺពិតជាគួរឱ្យធុញ ដោយពួកគេលេងត្រឹមសូន្យស្មើជាមួយប៉ូឡូញ ហើយរួចផុតការភ័យផើតពោះ នៅពេល Robert Lewandowski ស៊ុតប៉េណាល់ទីចុងម៉ោងមិនចូល។
ម៉ិកស៊ិកឈ្នះត្រឹមតែ២ប្រកួតប៉ុណ្ណោះក្នុងចំណោមការប្រកួត៧លើកចុងក្រោយរបស់ពួកគេ ហើយបានចាញ់៦លើកក្នុងចំណោមការជួបគ្នា៧លើកចុងក្រោយរបស់ពួកគេជាមួយនឹងអាហ្សង់ទីន ដោយមានគ្រាប់បាល់សរុប ២០-៤។
Messi ដែលស៊ុត១១គ្រាប់ឱ្យជម្រើសជាតិនៅ៥ប្រកួតចុងក្រោយ នឹងព្យាយាមរកគ្រាប់បាល់ឱ្យអាហ្សង់ទីន ហើយរំពឹងថាប្រវត្តិសាស្ត្រនឹងច្រំដែលរវាងក្រុមទាំងពីរ។
លទ្ធផលទស្សនទាយ អាហ្សង់ទីនឈ្នះ ៣-០៕
អាហ្សង់ទីនត្រូវការឈ្នះដាច់ខាតលើម៉ិកស៊ិក
