Views: 1
ប្រែសម្រួល : កញ្ញាដាលីស (ដេល្លីម៉េល) ៖ អាល្លឺម៉ង់បានធ្លាក់ចេញពីវគ្គចែកពូលវើលខាប់សាជាថ្មីម្តងទៀត ខណៈជប៉ុនបានកក់កៅអីក្នុងវគ្គ ១៦ ក្រុមចុងក្រោយក្នុងរាត្រីដ៏អស្ចារ្យមួយទៀតក្នុងប្រទេសកាតា។
កូនក្រុមរបស់លោក ហានស៊ី ភ្លីក (Hansi Flick) បានយកឈ្នះលើក្រុមជម្រើសជាតិកូស្តារីកាក្នុងលទ្ធផល ៤-២ ប៉ុន្តែវាមិនគ្រប់គ្រាន់ដើម្បីឡើងទៅវគ្គបន្តនោះទេ បន្ទាប់ពីជប៉ុនបានតាមពីក្រោយដើម្បីបំបាក់ក្រុមអេស្ប៉ាញនិងឡើងឈរលើទីកំពូលក្នុងពូល E។
ក្តីសង្ឃឹមរបស់បែលហ្ស៊ិកបានបញ្ចប់បន្ទាប់ពីលទ្ធផលស្មើទល់នឹងក្រូអាស៊ី ប៉ុន្តែមានសេចក្តីរីករាយសម្រាប់ម៉ារ៉ុកដែលបានផ្តួលកាណាដាដើម្បីឈរនៅលើកំពូលតារាងពូល F និងបានឡើងទៅវគ្គបន្តជាលើកដំបូងចាប់តាំងពីឆ្នាំ ១៩៨៦។
បន្ទាប់ពីចាញ់ជប៉ុនក្នុងការប្រកួតបើកឆាកនិងស្មើជាមួយអេស្ប៉ាញ ម្ចាស់ជើងឯកវើលខាប់៤សម័យកាលអាល្លឺម៉ងដឹងខ្លួនច្បាស់ថាមានតែជ័យជម្នះប៉ុណ្ណោះទើបអាចរក្សាក្តីសុបិនរបស់ពួកគេឱ្យនៅរស់ ហើយបន្ទាប់មកសង្ឃឹមថាលទ្ធផលគូផ្សេងទៀតនៅក្នុងពូលនឹងសមប្រកបតាមបំណងរបស់ពួកគេ។
សឺច ញ៉ាព្រី (Serge Gnabry) បានស៊ុតនាំមុខឱ្យអាល្លឺម៉ង់នៅកីឡដ្ឋាន Al Bayt ជាកន្លែងដែលអាជ្ញាកណ្តាលស្រីបារាំង ស្តេហ្វានី ហ្វ្រាតផាត (Stephanie Frappart) ក្លាយជាស្ត្រីដំបូងដែលធ្វើអាជ្ញាកណ្តាលវើលខាប់បុរស។
ទោះយ៉ាងណា កូស្តារីកា ដែលបានផ្តួលជប៉ុនបន្ទាប់ពីរងព្រនុងអេស្ប៉ាញ ៧-០ បានតាមស្មើតាមរយៈកីឡាករ យែលស៊ីន តេជេដា (Yeltsin Tejeda) នៅតង់ទីពីរ មុនពេលស៊ុតនាំមុខអាល្លឺម៉ង់វិញ នៅពេលដែលកីឡាករ វ័ន ប៉ាប្លូ វ៉ាហ្គាស (Juan Pablo Vargas) ត្រូវបាល់ផ្លាតចំជើងហើយចូលទីរបស់អាល្លឺម៉ង់។
ប្រសិនបើលទ្ធផលរក្សាដដែល កូស្តារីកានឹងឡើងវគ្គបន្ទាប់ជំនួសអេស្ប៉ាញ ប៉ុន្តែអាល្លឺម៉ង់បានវាយបកវិញតាមរយៈការស៊ុតបញ្ចូលទីពីរគ្រាប់ពីកីឡាករបម្រុង កាយ ហាវើត (Kai Havertz) មុនពេលនីក្លាស ហ្វូលគ្រុក (Niclas Fullkrug) ស៊ុតគ្រាប់បិទគូទចុងម៉ោង ប៉ុន្តែជោគវាសនារបស់កូនក្រុមរបស់លោកភ្លីកត្រូវបានសម្រេចរួចទៅហើយ។
ដោយឡែក ជប៉ុនបានវាយបកយ៉ាងអស្ចារ្យដើម្បីយកឈ្នះក្រុមអេស្ប៉ាញ ២-១ នៅកីឡដ្ឋាន Khalifa International Stadium និងទទួលបានចំណាត់ថ្នាក់កំពូលក្នុងពូល E។
អេស្ប៉ាញបានគ្រប់គ្រងបាល់ទាំងស្រុងនៅតង់ទីមួយ បន្ទាប់ពីបើកការនាំមុខតាមរយៈការតែតបាល់បញ្ចូលទីរបស់អាល់វ៉ារ៉ូ ម៉ូរ៉ាតា (Alvaro Morata)។
ទោះយ៉ាងណា ជប៉ុនបានកែប្រែជោគវាសនារបស់ពួកគេក្នុងចន្លោះពេលតែ ៥ នាទីនៅដើមតង់ទី ២។
កីឡាករបម្រុង រីតស៊ូ ដូអាន (Ritsu Doan) បានរកគ្រាប់បាល់តាមស្មើ មុនពេលកីឡាករ អៅ តាណាកា (Ao Tanaka) រកបានមួយគ្រាប់ទៀត ដែលត្រូវបានអនុញ្ញាតឱ្យចូលទី បន្ទាប់ពីការត្រួតពិនិត្យ VAR ដ៏យូរ បន្ទាប់ពីបាល់ហាក់ចេញពីខ្សែបន្ទាត់។
ក្រុមសាម៉ូរ៉ៃខៀវបានរក្សានូវជ័យជម្នះដ៏គួរឱ្យចងចាំមួយផ្សេងទៀត ដែលនាំឱ្យពួកគេឡើងទៅប៉ះក្រូអាស៊ីសម្រាប់កន្លែងមួយក្នុងវគ្គ ១/៤ ផ្តាច់ព្រ័ត្រ៕
ជប៉ុនឈ្នះអេស្ប៉ាញ២-១កាលពីថ្ងៃព្រហស្បតិ៍
អាល្លឺម៉ង់ឈ្នះក្រុមជម្រើសជាតិកូស្តារីកា តែធ្លាក់ចេញពីក្រុម១៦ចុងក្រោយ