Views: 8
ប្រែសម្រួល : កញ្ញាដាលីស (បាល់ទាត់) ៖ ល្ងាចនេះកាមេរូនត្រូវលេងប្រកួតទីពីរប៉ះជាមួយសែប៊ីក្នុងពូល G ដោយមិនសូវរំពឹងទទួលបានលទ្ធផលទេ ខណៈកូរ៉េខាងត្បូងត្រូវប៉ះជាមួយហ្គាណាដែលលើកនេះក្រុមអាស៊ីរបស់យើងសុំឈ្នះម្តងហើយ ក្រោយក្រុមអាស៊ីដទៃទៀតសុទ្ធតែធ្លាប់ភ្លក្សរសជាតិឈ្នះ។ ទន្ទឹមនេះ ប្រេស៊ីល ត្បិតមិនសូវមានយីអ៊ុនជាមួយក្រុមអឺរ៉ុប តែនៅតែរំពឹងឈ្នះស្វីសចំណែកព័រទុយហ្គាល់សឹងតែមិនដែលឈ្នះសោះលើក្រុមមកពីអាម៉េរិកឡាទីន ដូច្នេះថ្ងៃនេះអាចនឹងយ៉ាប់របស់អ៊ុយរូហ្គាយ។
– កាមេរូន vs សែប៊ី (ពូល G)
* កាមេរូនចាញ់ការប្រកួតវគ្គចែកពូលវើលខាប់៧លើកចុងក្រោយរបស់ពួកគេ។
* ការប្រកួតអន្តរជាតិចំនួន ១០ លើកចុងក្រោយរបស់កាមេរូនមានគ្រាប់បាល់តិចជាង ២,៥ គ្រាប់។
* សែប៊ីចាញ់២លើកនៃការប្រកួតអន្តរជាតិចំនួន ១៩ លើកចុងក្រោយរបស់ពួកគេ។
* Aleksandar Mitrovic ស៊ុត ៦ គ្រាប់ក្នុងការប្រកួត ៦ លើកចុងក្រោយរបស់សែប៊ី។
កាមេរូននិងសែប៊ីចាញ់ការប្រកួតបើកឆាកក្នុងពូលដូចគ្នា ដូច្នេះការប្រកួតថ្ងៃនេះពិតជាសំខាន់សម្រាប់ក្រុមទាំងពីរ។ ប្រេស៊ីលមានហាងឆេងខ្ពស់ក្នុងការឈរលេខ១ក្នុងពូល ខណៈស្វីស កាមេរូន និងសែប៊ី ប្រជែងយកលេខ២។
សែប៊ីបានទទួលជោគជ័យជាច្រើនក្នុងរយៈពេលពីរឆ្នាំចុងក្រោយនេះ ចាប់តាំងពីការខកខាន Euro 2020។ សែប៊ីបានចាញ់២លើកនៃការប្រកួតអន្តរជាតិចំនួន ១៩ លើកចុងក្រោយរបស់ពួកគេ ពួកគេឈរលេខ១ក្នុងពូលនៃវគ្គជម្រុះវើលខាប់ និងឈរលេខ១ក្នុងពូលនៃ Nations League របស់ពួកគេនៅរដូវក្តៅ។ សែប៊ីមានកីឡាករលេងក្នុងលីកកំពូលមួយចំនួននៅទូទាំងទ្វីបអឺរ៉ុប ហើយក្រុមរបស់លោក Dragan Stojkovic គួរតែអាចស្តារបរាជ័យរបស់ពួកគេក្នុងការប្រកួតថ្ងៃទីមួយ នៅពេលពួកគេលេងជាមួយកាមេរូន ដែលបន្ទាប់ពីបរាជ័យរបស់ពួកគេក្រោមស្នាដៃស្វីស ឥឡូវនេះបានចាញ់ការប្រកួតវគ្គចែកពូលវើលខាប់ ៧ លើកចុងក្រោយរបស់ពួកគេ។
គ្រាប់បាល់ក្រោម ២,៥ គឺជាជម្រើសឈ្នះឈ្នះនៅថ្ងៃប្រកួតបើកឆាកពូល H របស់កាមេរូននិងសែប៊ី ហើយខណៈការប្រកួតនៅថ្ងៃចន្ទនេះនឹងក្លាយជាការប្រកួតស្លាប់រស់ នោះគ្រាប់បាល់អាចនឹងខ្សត់នៅកីឡដ្ឋាន Al Janoub។ ការប្រកួតអន្តរជាតិ ១០ លើកចុងក្រោយរបស់កាមេរូនគឺមានគ្រាប់បាល់ក្រោម ២,៥ គ្រាប់ ហើយពួកគេបានបង្កការគំរាមកំហែងតិចតួចដល់ស្វីសនៅក្នុងការប្រកួតដំបូងរបស់ពួកគេ។
សែប៊ីស៊ុតប្រេស៊ីលបានតែ៤ជើង ហើយមិនចំគោលដៅសូម្បីមួយជើង។ ពួកគេថ្ងៃនេះប្រឈមមុខនឹងកាមេរូនដែលមានកម្រិតលេងទាបជាងពួកគេ ហើយដូច្នេះសែប៊ីគួរតែអាចឆ្លៀតឱកាសឈ្នះ ព្រោះពួកគេមានខ្សែប្រយុទ្ធមុតស្រួចរបស់ Fulham គឺ Aleksandar Mitrovic ដែលស៊ុតចូល៦គ្រាប់នៅ៦ប្រកួត។
លទ្ធផលព្យាករណ៍ សែប៊ីឈ្នះ ២-០។
– កូរ៉េខាងត្បូង vs ហ្គាណា (ពូល H)
* ហ្គាណាមិនដែលឈ្នះមួយប្រកួតសោះឡើយក្នុងវគ្គចែកពូលក្នុងវើលខាប់ ៤ លើកចុងក្រោយរបស់ពួកគេ។
* កូរ៉េខាងត្បូងចាញ់២ប្រកួតប៉ុណ្ណោះក្នុងចំណោមការប្រកួត ១៧ លើកចុងក្រោយរបស់ពួកគេ។
* Heung-Min Son បានស៊ុតបញ្ចូលទី ៤ គ្រាប់ក្នុងការបង្ហាញខ្លួន ៥ លើកចុងក្រោយរបស់គេសម្រាប់កូរ៉េខាងត្បូង។
កូរ៉េខាងត្បូងនិងហ្គាណាមានសន្ទុះចិត្តព្រោះតែការលេងដ៏ល្អរបស់ពួកគេក្នុងការប្រកួតបើកឆាកពូល H រៀងៗខ្លួន។ កូរ៉េខាងត្បូងទទួលបាន១ពិន្ទុដ៏លំបាកជាមួយអ៊ុយរូហ្គាយ ខណៈហ្គាណាបានចាញ់ព័រទុយហ្គាល់ ៣-២ ទាំងមិនអស់ចិត្តត្បិតលេងល្អជាង។ ការប្រកួតនៅថ្ងៃចន្ទនេះនៅកីឡដ្ឋាន Education City ក្នុងទីក្រុង Al Rayyan មានសារៈសំខាន់ណាស់ ប្រសិនបើក្រុមទាំងពីររំពឹងឡើងទៅវគ្គ ១៦ ក្រុមចុងក្រោយក្នុងប្រទេសកាតា។
មិនមានមនុស្សច្រើនផ្តល់ឱកាសឱ្យកូរ៉េខាងត្បូងឈ្នះលើអ៊ុយរូហ្គាយក្នុងការប្រកួតបើកឆាកក្នុងពូលរបស់ពួកគេ ហើយខណៈពួកគេស៊ុតមិនចំគោលដៅ កូរ៉េខាងត្បូងបានឱកាសល្អបំផុតជាច្រើននៃការប្រកួត ដែលត្រូវខ្សែប្រយុទ្ធ Hwang Ui-Jo យកទៅចាក់ចោលអស់។ កូរ៉េខាងត្បូងដឹងពីឱកាសរបស់ពួកគេក្នុងការជាប់លេខ២ក្នុងពូល H បើទទួលបាន៣ពិន្ទុពីហ្គាណា ហើយពួកគេនឹងមានការជំរុញទឹកចិត្តខ្ពស់ពីការស្មើកាលពីថ្ងៃព្រហស្បតិ៍។
ដោយហេតុថាក្រុមទាំងពីរដឹងច្បាស់ថាជ័យជម្នះនឹងផ្តល់ឱកាសដល់ពួកគេឡើងវគ្គបន្ទាប់ ដូច្នេះគ្រាប់បាល់ស៊ុតចូលគ្នារំពឹងកើតមានលើក្រុមទាំងពីរ។
ខ្សែប្រយុទ្ធ Heung-Min Son របស់ Tottenham គឺជាតារារះនៃក្រុមជម្រើសជាតិកូរ៉េខាងត្បូង ហើយអាចមានឱកាសរកគ្រាប់បាល់បានទល់នឹងហ្គាណា។ Son បានស៊ុតបញ្ចូលទី៤គ្រាប់ក្នុងការបង្ហាញខ្លួន ៥ លើកចុងក្រោយរបស់គេសម្រាប់កូរ៉េខាងត្បូង ហើយទើបតែធូរស្បើយពីរបួសមុខទាន់ពេលប្រកួតជាមួយអ៊ុយរូហ្គាយ។ កូរ៉េខាងត្បូងរំពឹងមានប្រៀបខ្ពស់ជាងហ្គាណា ហើយរំពឹងឈ្នះក្នុងលទ្ធផល ២-១។
– ប្រេស៊ីល vs ស្វីស (ពូល G)
* ប្រេស៊ីលស៊ុតចូលលើសពី២គ្រាប់នៅ៨ប្រកួតចុងក្រោយរបស់ពួកគេ។
* ស្វីសរបូត៣គ្រាប់ក្នុងជំនួបជាមួយអ៊ីតាលីនិងបារាំងនៅ Euro ឆ្នាំមុន។
* Richarlison បានស៊ុតបញ្ចូលទីច្រើនជាងកីឡាករប្រេស៊ីលណាៗទាំងអស់ ចាប់តាំងពីខែកញ្ញាឆ្នាំ ២០១៨។
* ស្វីសបានចាញ់៥ដងក្នុងការប៉ះគ្នាក្នុងវើលខាប់ ៨ លើកចុងក្រោយរបស់ពួកគេជាមួយនឹងក្រុមមកពីអាម៉េរិកខាងត្បូង។
ប្រេស៊ីលបានចាប់ផ្ដើមស្ទើរតែល្អឥតខ្ចោះសម្រាប់ការប្រកួតវើលខាប់២០២២ ខណៈពួកគេបានយកឈ្នះលើក្រុមសែប៊ី ២-០ ថ្ងៃបើកឆាក។ ទោះយ៉ាងណា ពួកគេត្រូវបាត់បង់ Neymar សម្រាប់ការប្រកួតជម្រុះសេសសល់ក្នុងពូល ដោយសាររបួសកជើង។
Neymar ត្រូវគេឈូសជើង ៥៣ ដងនៅវើលខាប់ ចាប់តាំងពីការបង្ហាញខ្លួនដំបូងរបស់គេក្នុងការប្រកួតវើលខាប់២០១៤។ គ្មានកីឡាករណាម្នាក់ត្រូវគេឈូសជើងច្រើនជាង Neymar (៩ ដង) នោះឡើយពេលលេងទល់នឹងសែប៊ី ដូច្នេះវាជាការល្អដែលប្រេស៊ីលទុករូបគេឱ្យសម្រាកជាពីរបួសសិន ខណៈពួកគេសម្លឹករកជ័យជម្នះលើកទី៦ជាប់ៗគ្នា។
ទោះបីជាគ្មានតារាឆ្នើមរបស់ពួកគេក៏ដោយ ក៏ប្រេស៊ីលនៅមានកីឡាករទេពកោសល្យជាច្រើនអាចស៊ុតបញ្ចូលទីរបស់ស្វីសនៅថ្ងៃចន្ទនេះ។
ចាប់តាំងពីឈ្នះវើលខាប់២០០២មក ប្រេស៊ីលបានចាញ់ប្រៀបក្រុមល្អៗនៅអឺរ៉ុប។ ប្រេស៊ីលរមែងចាប់ផ្តើមធ្លាក់ជើង នៅពេលប៉ះក្រុមខ្លាំងៗនៅអឺរ៉ុប ដោយក្នុងនោះពួកគេចាញ់ ១៦ ដងក្នុងចំណោម ១៨ ប្រកួតនៅវើលខាប់។
ត្បិតស្វីសមិនរំពឹងឈ្នះប្រេស៊ីល តែពួកគេជាការធ្វើតេស្តិ៍ធំមួយសម្រាប់ប្រេស៊ីល ថាតើពួកគេអាចដោះបណ្តាសារបស់ក្រុមអឺរ៉ុបនៅវើលខាប់បានឬអត់។
ជាមួយ Richarlison ជាអ្នករកគ្រាប់បាល់ច្រើនជាងគេឱ្យប្រេស៊ីល និងខណៈស្វីសចាញ់៥លើកនៃវើលខាប់៨ប្រកួតចុងក្រោយ ប្រេស៊ីលនៅតែរំពឹងឈ្នះខ្ពស់ជាង។ លទ្ធផលទស្សនទាយ ប្រេស៊ីលឈ្នះ ២-០។
– ព័រទុយហ្គាល់ vs អ៊ុយរូហ្គាយ (ពូល H)
* អ៊ុយរូហ្គាយឈ្នះ៤ដងក្នុងចំណោមការប្រកួតវើលខាប់ ៥ លើកចុងក្រោយរបស់ពួកគេជាមួយនឹងក្រុមអឺរ៉ុប រួមទាំងការឈ្នះលើព័រទុយហ្គាល់ក្នុងឆ្នាំ ២០១៨។
* ព័រទុយហ្គាល់ប៊ិះរបូតការនាំមុខ ៣-១ ទល់នឹងហ្គាណា ដែលមានចំណាត់ថ្នាក់ទាបបំផុតក្នុងវើលខាប់នៅថ្ងៃប្រកួតបើកឆាករបស់ពួកគេ។
* ព័រទុយហ្គាល់បានឈ្នះ១លើកគត់ក្នុង៩ប្រកួតចុងក្រោយទល់នឹងក្រុមមកពីអាម៉េរិកខាងត្បូង។
* Valverde បានស៊ុតបាល់បញ្ចូលទី ៤ គ្រាប់ក្នុង ៧ ប្រកួតចុងក្រោយរបស់គេសម្រាប់ក្រុម Real Madrid និងស៊ុតបញ្ចូលទីបាន៤គ្រាប់សម្រាប់អ៊ុយរូហ្គាយរហូតមកដល់បច្ចុប្បន្ន។
ការបើកយុទ្ធនាការវើលខាប់របស់អ្នកជាមួយនឹងជ័យជម្នះនិងគ្រាប់បាល់ចំនួន ៣ គ្រាប់គួរតែជាហេតុផលសម្រាប់ការអបអរ ប៉ុន្តែការទទួលជ័យជម្នះ ៣-២ របស់ព័រទុយហ្គាល់លើហ្គាណា មិនមែនជាសារដែលពួកគេចង់ផ្ញើចេញនោះទេ។ Cristiano Ronaldo បានបង្កើតកំណត់ត្រាថ្មីសម្រាប់ការស៊ុតចូលគ្រប់វើលខាប់ទាំង៥លើករបស់ព័រទុយហ្គាល់ ក្រោយស៊ុតចូលបាល់ប៉េណាល់ទី ប៉ុន្តែក្រុមរបស់គាត់ពិតជាមិនសមជាអ្នកប្រជែងពានវើលខាប់នោះទេ។
ព័រទុយហ្គាល់លេងជ្រួលច្របល់ជាងមួយម៉ោងជាមួយនឹងក្រុមហ្គាណាដែលមានចំណាត់ថ្នាក់ទាបបំផុតនៅវើលខាប់លើកនេះ។ បន្ទាប់មក ពួកគេត្រូវហ្គាណាតាមស្មើ ហើយក៏បានវាយបកនាំមុខវិញ ៣-១។ ថាមពលពីហ្គាណាគឺគួរឱ្យចាប់អារម្មណ៍ ដោយប៊ិះតាមបាន ៣-៣ នៅចុងម៉ោង។
អ៊ុយរូហ្គាយក៏បើកឆាកមិនអស្ចារ្យអីនោះដែរ ដោយស្មើ 0-0 ជាមួយកូរ៉េខាងត្បូង ហើយមិនអាចបង្កើតឱកាសស៊ុតបាននោះទេ។ ទោះយ៉ាងណា ការបង្ហាញទម្រង់ការពារដ៏រឹងមាំគឺជាអាវុធដ៏សំខាន់សម្រាប់ពួកគេ ហើយពួកគេមានកីឡាករទេពកោសល្យខាងវាយប្រហារគ្រប់គ្រាន់ដើម្បីបង្កព្យុះភ្លៀងលើព័រទុយហ្គាល់។
អ៊ុយរូហ្គាយមានខ្សែបម្រើរឹងមាំ ដែលចុះជួយដល់តំបន់ការពាររបស់ពួកគេផងដែរ។ ទោះយ៉ាងណា កីឡាករ Rodrigo Bentancur, Matias Vecino និង Federico Valverde សុទ្ធតែអាចជាការគំរាមកំហែងនៅពេលពួកគេសម្រុកទៅមុខ។ ខ្សែបម្រើរបស់ក្លិប Real Madrid គឺ Valverde បានបង្ហាញពីភាពខ្លាំងរបស់ខ្លួននៅប៉ុន្មានប្រកួតចុងក្រោយ ដោយស៊ុតបញ្ចូលទី៤គ្រាប់ និងបញ្ជូនបាល់ឱ្យមិត្តរួមក្រុមចំនួន២លើកក្នុង៧ប្រកួតចុងក្រោយរបស់គេសម្រាប់ក្រុមម្ចាស់ជើងឯកទ្វីបអឺរ៉ុប។
រូបគេស៊ុតចំគោលដៅជាមធ្យម១ជើងក្នុងមួយប្រកួតនៅទូទាំងលីក និង Champions League សម្រាប់ក្លិបរបស់គេ ហើយបានស៊ុតបញ្ចូលទី ៤ គ្រាប់រួចហើយនៅក្នុងអាជីពអន្តរជាតិរបស់គេរហូតមកទល់បច្ចុប្បន្ន។ រូបគេថ្ងៃនេះរំពឹងមានភាគរយខ្ពស់ក្នុងការបំប៉ោងសំណាញ់ទីរបស់ព័រទុយហ្គាល់។
ដោយហេតុថា ព័រទុយហ្គាល់អន់ជាមួយក្រុមមកពីអាម៉េរិកឡាទីន ហើយការពាររបស់អ៊ុយរូហ្គាយមានភាពរឹងមាំខ្លាំង យើងរំពឹងពួកគេចែកគ្នាម្នាក់១ពិន្ទុ ដោយលទ្ធផលទស្សនទាយ ១-១៕
កូរ៉េខាងត្បូងថ្ងៃនេះរំពឹងមានភាគរយខ្ពស់ក្នុងការយកឈ្នះលើហ្គាណា
