Views: 5
ប្រែសម្រួល : កញ្ញាដាលីស (បាល់ទាត់) ៖ ការប្រកួតវើលខាប់២០២២នៅកាតាឈានចូលជុំទី២នៃវគ្គជម្រុះតាមពូល ក្នុងនោះវែលនឹងបើកឆាកប៉ះអ៊ីរ៉ង់ ហើយក៏សង្ឃឹមឈ្នះលើក្រុមអាស៊ីមួយនេះផងដែរ។ ស្របពេលដូចគ្នានេះដែរ ហូឡង់ក៏ត្រូវប៉ះអេក្វាឌ័រមកពីអាម៉េរិកឡាទីន ដែលទំនងជាមានលទ្ធភាពស្មើគ្នាច្រើន ខណៈសេណេហ្គាល់និងអង់គ្លេសជាក្រុមរំពឹងទទួលបាន៣ពិន្ទុពេញ។
– វែល vs អ៊ីរ៉ង់ (ពូល B)
* វែលបង្កការចាប់អារម្មណ៍ក្នុងតង់ទីពីរទល់នឹងសហរដ្ឋអាម៉េរិក។
* អ៊ីរ៉ង់បានបើកឆាកនៅកាតាដោយចាញ់អង់គ្លេស ៦-២។
* Kieffer Moore គួរតែចាប់ផ្តើមជម្រើសដំបូង បន្ទាប់ពីបង្ហាញឥទ្ធិពលក្នុងនាមជាកីឡាករជំនួសទល់នឹងសហរដ្ឋអាម៉េរិក។
វែលបានវាយបកដើម្បីរកបានមួយពិន្ទុក្នុងការប្រកួតបើកឆាកវើលខាប់របស់ពួកគេជាមួយសហរដ្ឋអាម៉េរិក ហើយការឈ្នះលើអ៊ីរ៉ង់នៅថ្ងៃសុក្រនេះនឹងផ្តល់ឱ្យពួកគេនូវឱកាសពិតប្រាកដក្នុងការឈានទៅវគ្គបន្ត។
ដំបូងឡើយ ក្រុមនាគភ្លើងវែលបានជួបការលំបាកទល់នឹងអាម៉េរិក ហើយពួកគេបានតាមពីក្រោយ១គ្រាប់ពីការស៊ុតក្នុងតង់ទីមួយពីកីឡាករ Timothy Weah ។ ទោះយ៉ាងណា វែលបានវាយបកយ៉ាងអស្ចារ្យក្នុងតង់ទីពីរ ហើយបានដណ្តើម១ពិន្ទុដែលសមនឹងទទួលបាន ដោយសារការស៊ុតបាល់ប៉េណាល់ទីនៅតង់ទីពីររបស់ Gareth Bale ហើយពួកគេពិតជាអាចមានលទ្ធភាពឈ្នះលើអ៊ីរ៉ង់ ដែលទើបចាញ់អង់គ្លេសទក់សាច់ ៦-២។
វែលត្រូវប្រឈមមុខនឹងអង់គ្លេសក្នុងការប្រកួតចុងក្រោយក្នុងពូលរបស់ពួកគេ ដូច្នេះពួកគេត្រូវការលទ្ធផលជាខ្លាំងជាមួយអ៊ីរ៉ង់ ប្រសិនបើពួកគេចង់ឆ្លងទៅវគ្គបន្ត។ កូនក្រុមរបស់លោក Rob Page មិនអាចមើលស្រាលបានទេ ហើយពួកគេប្រហែលជាអាចទទួលបានអ្វីមួយពីការប្រកួតរបស់ពួកគេជាមួយនឹងក្រុមតោកំណាចអង់គ្លេស ប៉ុន្តែពួកគេមិនចង់ពឹងលើការប្រកួតចុងក្រោយនោះទេ ហើយពួកគេនឹងច្បាស់ជាប្រឹងយកឈ្នះលើអ៊ីរ៉ង់ឱ្យខាងតែបាន។
អ៊ីរ៉ង់សឹងតែគ្មានឱកាសតដៃជាមួយអង់គ្លេស ហើយបានរបូតមុន ៤-០ មុនពេលពួកគេអាចស៊ុតបញ្ចូលទីគ្រាប់ដំបូង។ កីឡាករ Mehdi Taremi របស់ Porto គឺជាខ្សែប្រយុទ្ធដ៏មានគុណភាព ហើយរូបគេជាអ្នកស៊ុតចូលទាំង២គ្រាប់ឱ្យអ៊ីរ៉ង់ ប៉ុន្តែរូបគេជាកីឡាករសំខាន់តែមួយគត់របស់អ៊ីរ៉ង់ ហើយប្រសិនបើវែលអាចធ្វើឱ្យរូបគេស្ងៀមស្ងាត់ នោះពួកគេគួរតែអាចទទួលបាន៣ពិន្ទុពេញ។
វែលបានឆ្លងកាត់ការប្រកួតចំនួន ៦ លើកដោយមិនបានទទួលជ័យជម្នះសោះ ហើយនោះគឺជាគួរឱ្យព្រួយបារម្ភ ប៉ុន្តែគួរកត់សម្គាល់ដែរថា ពួកគេបានលេងប៉ះបែលហ្ស៊ិកនិងហូឡង់ពីរដងក្នុងអំឡុងពេលនោះ។ ដូចនេះ ភាគរយឈ្នះរបស់វែលថ្ងៃនេះមានខ្ពស់ជាងអ៊ីរ៉ង់។
លទ្ធផលទស្សនទាយ វែលឈ្នះ ៣-១។
– កាតា vs សេណេហ្គាល់ (ពូល A)
* សេណេហ្គាល់បានឈ្នះការប្រកួតចំនួន៣លើកក្នុង៤លើករបស់ពួកគេដោយស៊ុតចូល២គ្រាប់ឡើងទៅនៅ AFCON កាលពីដើមឆ្នាំនេះ។
* កាតាចាញ់អេក្វាឌ័រ ២-០ ក្នុងការប្រកួតបើកឆាករបស់ពួកគេ។
* សេណេហ្គាល់ទប់ហូឡង់បាន ៨៤ នាទី។
* Krepin Diatta បានស៊ុតចំគោលដៅ ២ ជើងទល់នឹងហូឡង់។
ប្រទេសម្ចាស់ផ្ទះកាតាត្រូវប៉ះសេណេហ្គាល់ក្នុងការប្រកួតវើលខាប់នៅថ្ងៃសុក្រនេះ ហើយប្រទេសទាំងពីរនៅកំពុងស្វែងរកពិន្ទុដំបូងរបស់ពួកគេនៅឡើយ។
កាតាបានចាញ់អេក្វាឌ័រក្នុងលទ្ធផល ២-០ ក្នុងការប្រកួតបើកឆាករបស់ពួកគេ ហើយពួកគេមើលទៅពិតជាគ្មានសមត្ថភាពទទួលបានអ្វីចេញពីការប្រកួតនោះសោះឡើយ។ ម្ចាស់ជើងឯកអាហ្វ្រិកសេណេហ្គាល់បានចាញ់ដោយពិន្ទុដូចគ្នាក្រោមថ្វីដៃហូឡង់ ហើយប្រហែលជាមិនមានសំណាងដែលមិនអាចស៊ុតចូល១គ្រាប់។
កាតាចាញ់ប្រៀបទាំងស្រុងលើទីលានទល់នឹងក្រុមអេក្វាឌ័រដែលមានការរៀបចំយ៉ាងល្អ ហើយពួកគេអាចនឹងលំបាកជាមួយក្រុមសេណេហ្គាល់ដែលមានកាយសម្បទារឹងមាំជាង។
ក្រុមតោកំណាចអាហ្វ្រិកនេះលេងល្អខ្លាំងណាស់ទល់នឹងហូឡង់ ហើយពួកគេគួរតែទទួល៣ពិន្ទុពេញទល់នឹងកាតា ដែលមានស្តង់ដារទាបជាងពួកគេ។
ត្បិតសេណេហ្គាល់អវត្តមាន Sadio Mane ក៏ប៉ុន្តែពួកគេនៅមានកីឡាករ Krepin Diatta ដែលស៊ុតចំគោលដៅ២ជើងលើហូឡង់ ហើយរូបគេមើលទៅមុតស្រួចខ្លាំងណាស់។ ម្ចាស់កាតាពេលប្រកួតបើកឆាកគឺគ្មានឱកាសស៊ុតចូលអេក្វាឌ័រសោះឡើយ ហើយថ្ងៃនេះទៀតសោតក៏មិនទំនងមានឱកាសឈ្នះឬសូម្បីតែស្មើ។
លទ្ធផលទស្សនទាយ សេណេហ្គាល់ឈ្នះ ៣-០ ។
– ហូឡង់ vs អេក្វាឌ័រ (ពូល A)
* បីប្រកួតចុងក្រោយរបស់ហូឡង់មិនដែលមានគ្រាប់បាល់ស៊ុតចូល៣គ្រាប់នោះឡើយ។
* គ្រាប់បាល់តិចជាង ២,៥ បានកើតឡើង ១៣ លើកនៃការប្រកួត ១៤ លើកចុងក្រោយរបស់អេក្វាឌ័រ។
* ហូឡង់រក្សា Clean Sheet ចំនួន៣លើកជាប់ៗគ្នា។
ហូឡង់និងអេក្វាឌ័របានចាប់ផ្ដើមវើលខាប់ជាមួយនឹងជ័យជម្នះ ២-០ ដូចគ្នា ហើយការឈ្នះថ្ងៃនេះសម្រាប់ក្រុមទាំងពីរគឺគ្រប់គ្រាន់ដើម្បីឆ្លងទៅវគ្គបន្ទាប់ ត្បិតនៅសល់១ប្រកួតក្នុងដៃ។
ហូឡង់ហាក់ស្រុតកម្លាំងពេលប្រកួតទល់នឹងសេណេហ្គាល់ ប៉ុន្តែនៅតែអាចរកបាន២គ្រាប់នៅចុងម៉ោង។
អេក្វាឌ័របានយកឈ្នះប្រទេសម្ចាស់ផ្ទះកាតាយ៉ាងងាយស្រួល ហើយមិនបានទទួលការសាកល្បងអ្វីធំដុំនោះទេ ព្រោះឈ្នះស្រួលខ្លាំងពេក។
ក្រុមទាំងពីរនេះមានកំណត់ត្រាការពារដ៏រឹងមាំដូចគ្នា ខណៈហូឡង់ចង់ស្វែងរក Clean Sheet ៤លើកជាប់ៗគ្នា ខណៈអេក្វាឌ័រមិនបានរបូតគ្រាប់បាល់សោះដែរចាប់តាំងពីការប្រកួតស្មើ ១-១ ជាមួយអាហ្សង់ទីនកាលពីខែមីនា។
នេះអាចជាសមរភូមិយុទ្ធសាស្ត្រដ៏គួរឱ្យចាប់អារម្មណ៍ ប៉ុន្តែវាក៏អាចជាការប្រកួតដែលសឹងតែគ្មានគ្រាប់បាល់នោះដែរ ដូច្នេះជម្រើសស៊ុតចូលក្រោម ២,៥ គ្រាប់គឺសមហេតុផលបំផុត។
ហូឡង់ទម្រាំឈ្នះសេណេហ្គាល់គឺលំបាកណាស់ ខណៈគ្រាប់បាល់ដំបូងបានកើតឡើងនៅនាទីទី ៨៤ ហើយខ្សែការពារអេក្វាឌ័រមានសមត្ថភាពទប់ហូឡង់ហួសពី៨៤នាទីទៅទៀត ឬអាចទប់បាន១២០នាទីក៏ថាបាន។
លទ្ធផលព្យាករណ៍ ០-០។
– អង់គ្លេស vs សហរដ្ឋអាម៉េរិក (ពូល B)
* ពីរប្រកួតចុងក្រោយរបស់អង់គ្លេស មានគ្រាប់បាល់ស៊ុតចូលគ្នាដល់ទៅ ១៤ គ្រាប់។
* សហរដ្ឋអាម៉េរិកអាចរកគ្រាប់បាល់បានទល់នឹងអង់គ្លេស ព្រោះពួកគេរក្សា Clean Sheet បានតែម្តងគត់ក្នុង ៧ ប្រកួតចុងក្រោយ។
* អង់គ្លេសបានយកឈ្នះអ៊ីរ៉ង់ ៦-២ ក្នុងការបើកឆាករបស់ពួកគេ។
* Bukayo Saka ស៊ុតបាន២គ្រាប់ទល់នឹងអ៊ីរ៉ង់។
អង់គ្លេសបានប្រកាសភាពខ្លាំងរបស់ពួកគេជាមួយនឹងជ័យជម្នះ ៦-២ លើអ៊ីរ៉ង់ក្នុងការប្រកួតបើកឆាកវើលខាប់២០២២របស់ពួកគេ ហើយពួកគេនឹងសម្លឹងរកជ័យជម្នះបែបនេះម្តងទៀតលើសហរដ្ឋអាម៉េរិក។
ជ័យជម្នះមួយទៀតសម្រាប់កូនក្រុមរបស់លោក Gareth Southgate នឹងឃើញពួកគេមានលក្ខណៈសម្បត្តិគ្រប់គ្រាន់សម្រាប់ជុំបន្ទាប់ ប៉ុន្តែអាម៉េរិកគួរតែផ្តល់ឱ្យពួកគេនូវការសាកល្បងដ៏ធំមួយនៅកីឡដ្ឋាន Al Bayt ក្នុងទីក្រុង Al Khor ។
សហរដ្ឋអាម៉េរិកមើលទៅល្អណាស់ក្នុងតង់ទី១ នៃការប្រកួតបើកឆាកទល់នឹងវែល ហើយប្រហែលជាសំណាងមិនល្អដែលនាំមុខត្រឹមតែ ១-0 នៅតង់ទី១។ ពួកគេបានស្រុតចុះកម្លាំងបន្ទាប់ពីការចាប់ផ្តើមតង់ទី២ ហើយទីបំផុតពួកគេត្រូវបានវែលតាមស្មើ ១-១។
អង់គ្លេសគួរតែស្ថិតក្នុងអារម្មណ៍មានទំនុកចិត្តខ្ពស់ បន្ទាប់ពីបានស៊ុត ៦ គ្រាប់ទល់នឹងអ៊ីរ៉ង់ ខណៈសហរដ្ឋអាម៉េរិកអាចបាក់ទឹកចិត្តបន្តិច បន្ទាប់ពីរបូតការនាំមុខលើវែល។
ការឈ្នះសម្រាប់ក្រុមតោកំណាចថ្ងៃនេះពិតជាមានខ្ពស់ ប៉ុន្តែលទ្ធភាពស៊ុតចូលគ្នាលើសពី ២,៥ គ្រាប់ក៏ជាជម្រើសល្អដែរ។
មានការស៊ុតបាល់បញ្ចូលទីចំនួន ១៤ គ្រាប់នៅ២ប្រកួតចុងក្រោយរបស់អង់គ្លេស ហើយការពិតដែលថា ពួកគេមានអ្នកស៊ុតបញ្ចូលទី ៥ នាក់ផ្សេងគ្នាមិនមែន Harry Kane ក្នុងពេលឈ្នះលើអ៊ីរ៉ង់ក៏បង្ហាញដែរថា សមាជិកក្រុមសុទ្ធតែមានលទ្ធភាពស៊ុតបញ្ចូលទី។
សហរដ្ឋអាម៉េរិកក៏អាចមានលទ្ធភាពទម្លុះសំណាញ់ទីអង់គ្លេសបានផងដែរ ខណៈពួកគេបានស៊ុតបញ្ចូលទី ១៥ គ្រាប់ក្នុងការប្រកួត ៩ លើកចុងក្រោយរបស់ពួកគេ ហើយក្រុមអង់គ្លេសរក្សា Clean Sheet បានតែមួយប្រកួតប៉ុណ្ណោះក្នុងការប្រកួត ៧ លើកចុងក្រោយរបស់ពួកគេ។
លទ្ធផលព្យាករណ៍ អង់គ្លេសឈ្នះ ៣-១៕
អង់គ្លេសរំពឹងឈ្នះអាម៉េរិកដើម្បីឡើងទៅវគ្គ ១៦ ក្រុមចុងក្រោយ