Views: 1
ប្រែសម្រួល : កញ្ញាដាលីស (បាល់ទាត់) ៖ សម្រាប់វគ្គជម្រុះវើលខាប់តាមពូលជុំចុងក្រោយក្នុងពូល C និង D ថ្ងៃនេះ ក្រុមបារាំងបានឡើងទៅវគ្គបន្ទាប់រួចហើយ ដូច្នេះអាចនឹងសម្រាកកីឡាករល្អៗច្រើន ចំណែកអូស្ត្រាលីសុំត្រឹមស្មើជាមួយក្រុមធ្លាក់ជើងដាណឺម៉ាក ជាការស្រេច។ ស្របពេលនេះដែរអាហ្សង់ទីនចាំបាច់ត្រូវឈ្នះប៉ូឡូញហើយអារ៉ាប៊ីសាអូឌីតអាចនឹងបង្កើតប្រវត្តិសាស្ត្រឆ្លងទៅវគ្គ១៦ក្រុមជាលើកដំបូងតាមរយៈការយកឈ្នះលើម៉ិកស៊ិក។
– អូស្ត្រាលី vs ដាណឺម៉ាក (ពូល D)
* អូស្ត្រាលីនិងដាណឺម៉ាកស៊ុតចូលគ្នាតែ៣គ្រាប់ប៉ុណ្ណោះរវាងពួកគេមកទល់ពេលនេះ។
* អូស្ត្រាលីមិនស្គាល់ចាញ់សោះក្នុងការប្រកួត៦លើកក្នុងចំណោមការប្រកួតអន្តរជាតិ៧លើកចុងក្រោយរបស់ពួកគេ។
* ការស្មើនឹងគ្រប់គ្រាន់ដើម្បីឱ្យអូស្ត្រាលីមានសិទ្ធិឡើងទៅវគ្គបន្ត។
* Riley McGree បានស៊ុតបញ្ចូលទីក្នុងការប្រកួតចុងក្រោយរបស់គេសម្រាប់ Middlesbrough មុនការប្រកួតវើលខាប់។
លទ្ធផលទាំងអស់នៅតែអាចទៅរួចក្នុងការប្រកួតជុំចុងក្រោយក្នុងវើលខាប់ពូល D ខណៈអូស្ត្រាលី ដាណឺម៉ាក និងទុយនីស៊ី កំពុងប្រជែងយកចំណាត់ថ្នាក់លេខ ២ ។
អូស្ត្រាលីមានប្រៀបជាងគេព្រោះពួកគេត្រូវការត្រឹមស្មើប៉ុណ្ណោះដើម្បីឡើងទៅវគ្គបន្ត ប៉ុន្តែក្នុងករណីនេះពួកគេត្រូវពឹងលើបារាំងកុំឱ្យចាញ់ទុយនីស៊ីឱ្យសោះ។
ទន្ទឹមនឹងនេះ ដាណឺម៉ាកត្រូវតែឈ្នះដាច់ខាតដើម្បីមានឱកាសឡើងវគ្គបន្ត ហើយប្រសិនបើពួកគេធ្វើដូច្នេះបាន ពួកគេត្រូវបន់កុំឱ្យទុយនីស៊ីឈ្នះបារាំងច្រើនគ្រាប់។
ថ្វីត្បិតតែពួកគេចាញ់បារាំង ៤-១ នៅថ្ងៃបើកឆាកក៏ដោយ ក៏ប៉ុន្តែអូស្ត្រាលីបានវាយបកវិញជាមួយនឹងជ័យជម្នះយ៉ាងលំបាកលើក្រុមទុយណេស៊ី ១-០។ លទ្ធផលនោះមានន័យថា ពេលនេះពួកគេអាចតាមស្មើកំណត់ត្រាវើលខាប់ដ៏ល្អបំផុតរបស់ពួកគេ ប្រសិនបើពួកគេអាចចៀសវាងបរាជ័យជាមួយនឹងដាណឺម៉ាក ដែលជាក្រុមមួយក្នុងចំណោមក្រុមដែលលេងអន់បំផុតនៅវើលខាប់នេះ។
អូស្ត្រាលីមានចំណាត់ថ្នាក់ FIFA ទាបជាងដាណឺម៉ាក ប៉ុន្តែពួកគេបានបង្ហាញថា ពួកគេមិនមែនមកទីនេះដើម្បីតែបង្កើនចំណាត់ថ្នាក់នោះទេ គឺដើម្បីមកឈ្នះវើលខាប់។
ខណៈរូបគេមិនទាន់បានលេងពេញ ៩០ នាទីនៅឡើយ កីឡាករ Riley McGree មើលទៅគ្រោះថ្នាក់ណាស់នៅក្នុងតំបន់ប្រយុទ្ធសម្រាប់អូស្ត្រាលី ហើយការទាត់បែបកន្ត្រៃហោះដ៏អស្ចារ្យរបស់គេលើ Norwich សម្រាប់ក្រុម Middlesbrough គឺគ្រប់គ្រាន់សម្រាប់ឱ្យពួកយើងជ្រើសយករូបគេស៊ុតចូលទីនៅថ្ងៃនេះ។
លទ្ធផលស្មើជាមួយទុយនីស៊ីបន្ទាប់មកការរងបរាជ័យក្រោមថ្វីជើងរបស់បារាំងក្នុងជុំចុងក្រោយបានធ្វើឱ្យដាណឺម៉ាករកកល់នឹងធ្លាក់ពីវើលខាប់ ដែលជាការលេងដ៏អន់បំផុតសម្រាប់ក្រុមមកពីវគ្គពាក់កណ្តាលផ្តាច់ព្រ័ត្រ EURO 2020 នាពេលថ្មីៗនេះ។
មានតែជ័យជម្នះទេដែលនឹងឃើញដាណឺម៉ាកមានលក្ខណៈសម្បត្តិគ្រប់គ្រាន់ឡើងទៅវគ្គបន្ត ហើយសូម្បីដូច្នេះក្តីក៏ពួកគេនៅតែពឹងលើលទ្ធផលនៅប្រកួតផ្សេងដែរ។ អ្នកចាត់ការទូទៅលោក Kasper Hjulmand នៅតែសង្ឃឹមថា ពួកគេនឹងឈ្នះអូស្ត្រាលី ប៉ុន្តែពួកគេលេងមិនសូវល្អទេថ្មីៗនេះ និងមានប្រយុទ្ធខ្សោយ។
លទ្ធភាពស្មើគ្នាគឺជាជម្រើសល្អបំផុតសម្រាប់គូនេះ។
– ទុយនីស៊ី vs បារាំង (ពូល D)
* បារាំងរបូតគ្រាប់បាល់ក្នុងពូលទាំងពីរប្រកួតរបស់ពួកគេ ហើយមាន Clean Sheet ត្រឹមតែម្តងគត់ក្នុងការប្រកួត៨លើកចុងក្រោយរបស់ពួកគេ។
* ទុយនេស៊ីត្រូវតែឈ្នះដាច់ខាតដើម្បីមានឱកាសឡើងវគ្គបន្ទាប់ ដូច្នេះចាំបាច់ត្រូវសម្រុកទៅមុខជានិច្ច។
* បារាំងបានឈ្នះទាំង២ប្រកួតមកទល់ពេលនេះ។
* កីឡាករ Kingsley Coman ស៊ុតបញ្ចូលទីបាន២គ្រាប់ក្នុងការប្រកួតជម្រុះចំនួន៧លើក ហើយអាចជាប់ជម្រើសដំបូងសម្រាប់ជម្រើសជាតិបារាំងដែលឡើងវគ្គបន្ទាប់រួចទៅហើយ។
ក្រុមការពារតំណែងជើងឯកបារាំងបានកក់កៅអីមួយក្នុងវគ្គ ១៦ ក្រុមចុងក្រោយរួចហើយ ហើយពួកគេនឹងបញ្ចប់វគ្គចែកពូលជាមួយនឹងទុយនីស៊ី ដែលត្រូវការឈ្នះដាច់ខាតនៅថ្ងៃពុធនេះ។
ប្រទេសអាហ្វ្រិកខាងជើងនេះមានតែ១ពិន្ទុប៉ុណ្ណោះពីការប្រកួតទាំងពីររបស់ពួកគេមកទល់ពេលនេះ ហើយសូម្បីតែ៣ពិន្ទុទល់នឹងបារាំងក៏ប្រហែលជាមិនគ្រប់គ្រាន់ដើម្បីបញ្ចៀសការធ្លាក់នោះដែរ។
ទុយនេស៊ីមិនទាន់រកគ្រាប់បាល់បានទេនៅវើលខាប់កាតា ប៉ុន្តែពួកគេអាចនឹងបញ្ចប់ភាពរាំងស្ងួតនៃគ្រាប់បាល់របស់ពួកគេទល់នឹងបារាំង ដែលទំនងជានឹងដាក់កីឡាករបម្រុងលេងព្រោះពួកគេជាប់រួចទៅហើយ។
មាន់គកគឺជាក្រុមរំពឹងឈ្នះជាងក្នុងការប្រកួតនេះ ហើយបើអាច ពួកគេនឹងដណ្តើមយក៣ពិន្ទុតែម្តង ប៉ុន្តែដោយសារទុយនេស៊ីជាក្រុមដែលត្រូវការឈ្នះដាច់ខាត ហើយគ្រូបង្វឹក Didier Deschamps អាចនឹងជ្រើសរើសកីឡាករបម្រុងឱ្យលេងសម្រាប់បារាំង នោះលទ្ធភាពដែលថាបារាំងឈ្នះងាយៗគឺមិនទំនងកើតឡើងទេ ប៉ុន្តែការស៊ុតចូលគ្នាអាចជាជម្រើសល្អជាង។
លទ្ធផលទស្សនទាយ ១-១។
– ប៉ូឡូញ vs អាហ្សង់ទីន (ពូល C)
* អាហ្សង់ទីនរក្សា Clean Sheet ៦ ដងក្នុង ៧ ប្រកួតចុងក្រោយរបស់ពួកគេ។
* ប៉ូឡូញជួបការលំបាកជាមួយម៉ិកស៊ិក ហើយឈ្នះអារ៉ាប៊ីសាអូឌីតទាំងសំណាង។
* Lionel Messi បានស៊ុតបញ្ចូលទីបាន២គ្រាប់ក្នុងចំណោម៣គ្រាប់របស់អាហ្សង់ទីននៅវើលខាប់ ហើយរូបគេបានជួយបញ្ជូនបាល់បានមួយគ្រាប់ផងដែរ។
ប៉ូឡូញនាំមុខគេក្នុងការប្រកួតវើលខាប់ពូល C ប៉ុន្តែពួកគេប្រហែលជាត្រូវពឹងលើលទ្ធផលនៅកន្លែងផ្សេងទៀតដើម្បីឡើងទៅវគ្គបន្ត នៅពេលដែលពួកគេជួបអាហ្សង់ទីនក្នុងការប្រកួតជុំចុងក្រោយនៅថ្ងៃពុធនេះ។
គីឡូធ្ងន់អាម៉េរិកខាងត្បូងមួយនេះបានចូលវើលខាប់ក្នុងចំណោមក្រុមរំពឹងលើកពានមួយដែរ ប៉ុន្តែបន្ទាប់មកត្រូវបានអារ៉ាប៊ីសាអូឌីតសំពង ២-១ នៅក្នុងការខកចិត្តដ៏ធំបំផុតនៅក្នុងប្រវត្តិសាស្ត្រវើលខាប់។
អាហ្សង់ទីនបានវាយសម្រុកយ៉ាងខ្លាំង ហើយរកបានគ្រាប់បាល់បញ្ចូលទីយ៉ាងល្អនៅតង់ទីមួយក្នុងការប្រកួតនោះ ប៉ុន្តែការសប្បាយចិត្តហួសប្រមាណបានធ្វើឱ្យពួកគេជិះសេះលែងដៃ រហូតដល់ចុងបញ្ចប់ត្រូវរងបរាជ័យយ៉ាងអាម៉ាស់។ ក្រោយមកអាហ្សង់ទីនចាប់ផ្តើមលេងម៉ឺងម៉ាត់ទល់នឹងម៉ិកស៊ិក ដោយកត់ត្រាជ័យជម្នះ ២-០ ហើយពួកគេគួរតែមានប្រៀបខ្លាំងលើប៉ូឡូញ ដែលឈ្នះអារ៉ាប៊ីសាអូឌីតទាំងសំណាង។
ប៉ូឡូញមានខ្សែប្រយុទ្ធកណ្តាលល្អបំផុតក្នុងពិភពបាល់ទាត់គឺ Robert Lewandowski ប៉ុន្តែរូបគេលេងឱ្យជម្រើសជាតិមិនល្អដូចលេងឱ្យ Barcelona ទេ។
ប៉ូឡូញមើលទៅប្រៀបបីដូចជាតោគ្មានធ្មេញ ហើយពួកគេសឹងតែមិនបានស៊ុតសោះក្នុងការស្មើ ០-០ ជាមួយម៉ិកស៊ិកថ្ងៃបើកឆាក ខណៈពួកគេរងការគ្របសង្កត់យ៉ាងខ្លាំងពីសំណាក់អារ៉ាប៊ីសាអូឌីត ហើយចុងក្រោយបែរជាឈ្នះស្ទាំងបៃតងរបស់អាស៊ី២-០ទាំងសំណាង។
នោះសបញ្ជាក់ថា ពួកគេអាចនឹងពិបាកក្នុងការបង្កើតឱកាសស៊ុតលើអាហ្សង់ទីន ហើយលទ្ធភាពដែលអាហ្សង់ទីនឈ្នះទល់សូន្យគឺមានខ្ពស់ណាស់នៅថ្ងៃនេះ។
លទ្ធផលទស្សនទាយ អាហ្សង់ទីនឈ្នះ ២-០។
– អារ៉ាប៊ីសាអូឌីត vs ម៉ិកស៊ិក (ពូល C)
* ម៉ិកស៊ិកខកខានរកគ្រាប់បាល់ក្នុងការប្រកួតវើលខាប់៤ប្រកួតចុងក្រោយ។
* អារ៉ាប៊ីសាអូឌីតព្យាយាមស៊ុត ១៦ ជើងដោយមិនអាចរកគ្រាប់បាល់បានទល់នឹងប៉ូឡូញ។
* បីប្រកួតវើលខាប់ចុងក្រោយរបស់ម៉ិកស៊ិកគឺមានគ្រាប់បាល់តិចជាង ២,៥ គ្រាប់។
* អារ៉ាប៊ីសាអូឌីតបានគេចផុតពីការចាញ់ក្នុងការប្រកួត៨លើកនៃការប្រកួត១០លើកចុងក្រោយរបស់ពួកគេ។
ថ្វីត្បិតតែចាញ់ក្នុងលទ្ធផល ២-០ ជាមួយប៉ូឡូញក៏ពិតមែន ប៉ុន្តែអារ៉ាប៊ីសាអូឌីតលេងល្អជាងឆ្ងាយណាស់ ហើយនៅតែមានឱកាសឡើងទៅវគ្គ១៦ក្រុមចុងក្រោយ។ មានតែជ័យជម្នះតែមួយគត់ទើបគ្រប់គ្រាន់ដើម្បីធានាការឡើងទៅវគ្គបន្តនៃវើលខាប់មិនធ្លាប់មានក្នុងប្រវត្តិសាស្ត្រ ខណៈលទ្ធផលស្មើនឹងគ្រប់គ្រាន់ ប្រសិនបើប៉ូឡូញយកឈ្នះលើអាហ្សង់ទីនក្នុងការប្រកួតផ្សេងទៀត។
យ៉ាងណាមិញ ម៉ិកស៊ិកកំពុងរកកល់ជ្រុះចេញពីវើលខាប់ បន្ទាប់ពីបានឈានផុតពីវគ្គចែកពូលក្នុងរាល់ការប្រកួតវើលខាប់ ៧ លើកចុងក្រោយ។ ថ្ងៃនេះម៉ិកស៊ិកត្រូវតែឈ្នះ ប៉ុន្តែក៏មិនធានាថាឡើងដែរ។
ថ្វីបើអារ៉ាប៊ីសាអូឌីតមិនដែលឈ្នះម៉ិកស៊ិក (ស្មើ១ ចាញ់៤) ប៉ុន្តែការស៊ុត ១៩ ជើងរបស់ពួកគេក្នុងការប្រកួតតែ ២ លើកមកទល់ពេលនេះបង្ហាញថា ពួកគេមិនខ្លាចក្រុមណាទាំងអស់។
ជឿជាក់ថាអារ៉ាប៊ីសាអូឌីតនឹងបង្កព្យុះភ្លៀងសាជាថ្មីលើម៉ិកស៊ិក ដែលកំពុងធ្លាក់ជើង និងអាចយកឈ្នះក្នុងលទ្ធផលប៉ាន់ស្មាន ១-០៕
អារ៉ាប៊ីសាអូឌីតនឹងនាំមកនូវមោទនភាពធំធេងជូនតំបន់មជ្ឈិមបូព៌ា ប្រសិនបើឈ្នះលើម៉ិកស៊ិក ឡើងទៅវគ្គ១៦ក្រុមចុងក្រោយ