Views: 5
ប្រែសម្រួល : កញ្ញាដាលីស (ដេល្លីម៉េល) ៖ យានអវកាសណាសាបានបំបុកដុំថ្មអវកាស(ផ្កាយព្រះគ្រោះ)មួយក្នុងល្បឿនយ៉ាងលឿនកាលពីថ្ងៃចន្ទទី២៧កញ្ញានៅក្នុងការហាត់សមមិនធ្លាប់មានពីមុនមកសម្រាប់ថ្ងៃដែលថ្មពិឃាតណាមួយគំរាមកំហែងផែនដី។
ការបំបុកដ៏ខ្លាំងនេះបានកើតឡើងនៅលើផ្កាយព្រះគ្រោះគ្មានគ្រោះថ្នាក់មួយនៅចម្ងាយ ១១,៣ លានគីឡូម៉ែត្រពីផែនដី ដោយយានអវកាសឈ្មោះ Dart បានបំបុកចូលទៅក្នុងថ្មអវកាសនេះក្នុងល្បឿន ២២.៥០០ គីឡូម៉ែត្រក្នុងមួយម៉ោង។
អ្នកវិទ្យាសាស្ត្ររំពឹងថា ការបំបុកនេះអាចបង្កើតបានជារូងមួយ រុញច្រានថ្មនេះទៅក្នុងលំហ ហើយសំខាន់បំផុតគឺប្តូរគន្លងរបស់វា។
លោកស្រី អេឡេណា អាដាំ (Elena Adams) មកពីមណ្ឌលគ្រប់គ្រងបេសកកម្ម បានប្រកាសទាំងអរលោតកញ្ឆេងថា “យើងបានបំបុកហើយ!”។
កែវយឹតជុំវិញពិភពលោកនិងក្នុងលំហបានសំដៅទៅចំណុចតែមួយនៅលើមេឃដើម្បីចាប់យកទស្សនីយភាពនេះ។ ទោះបីជាការបំបុកមើលឃើញជាក់ស្តែងភ្លាមៗក៏ដោយ ក៏ប៉ុន្តែសញ្ញារកលវិទ្យុរបស់យាន Dart បានឈប់ភ្លាមៗ ដូច្នេះវានឹងត្រូវការពេលច្រើនថ្ងៃឬច្រើនសប្តាហ៍ដើម្បីកំណត់ថាតើផ្លូវរបស់អាចម៌ផ្កាយនោះត្រូវបានផ្លាស់ប្តូរបានប៉ុន្មាន។
យានបេសកកម្មតម្លៃ ៣២៥ លានដុល្លារនេះគឺជាការប៉ុនប៉ងលើកដំបូងដើម្បីផ្លាស់ប្តូរទីតាំងនៃដុំថ្មអវកាស ឬវត្ថុធម្មជាតិផ្សេងទៀតនៅក្នុងលំហ។
លោក ឡូរី ក្លេស (Lori Glaze) នាយកផ្នែកវិទ្យាសាស្ត្រភពផែនដី បាននិយាយថា “យើងកំពុងចាប់ផ្តើមយុគសម័យថ្មីនៃមនុស្សជាតិ”។
មុននេះ អ្នកគ្រប់គ្រងរបស់ណាសា លោក ប៊ីល នែលសុន (Bill Nelson) បានក្រើនរំលឹកមនុស្សតាមរយៈ Twitter ថា “ទេ នេះមិនមែនជាគ្រោងការថតភាពយន្តទេ”។ គាត់បានបន្ថែមក្នុងវីដេអូដែលបានថតទុកជាមុនថា “យើងទាំងអស់គ្នាបានឃើញវានៅលើខ្សែភាពយន្តដូចជា រឿង Armageddon ប៉ុន្តែភាពជាក់ស្តែងពិតៗគឺអស្ចារ្យខ្លាំងណាស់”៕
រូបគំណុរយាន Dart បំបុកអាចម៌ផ្កាយគ្មានគ្រោះថ្នាក់នៅថ្ងៃចន្ទនេះ