Views: 11
ដោយៈ បូកគោ / កំពតៈ លោកស្រី មីន មាណវី រដ្ឋលេខាធិការ ក្រសួងសាធារណការ និងដឹកជញ្ជូន បានបញ្ជាក់ថាៈ សិស្សានុសិស្ស និងយុវជនវ័យ អាយុចន្លោះពី ១៥ ទៅ ២៩ ឆ្នាំ ជាក្រុមមនុស្សងាយ ប្រឈមនឹងគ្រោះថ្នាក់ចរាចរ ដោយសារពួកគេ មិនទាន់យល់ពីច្បាប់ចរាចរណ៍ និងគ្មានបទពិសោធន៍ ក្នុងការបើកបរ។ អង្គភាពស្ថាប័នជំនាញពាក់ព័ន្ធ និងអាណាព្យាបាល ព្រមទាំងលោកគ្រូអ្នកគ្រូ ត្រូវឧស្សាហ៍បញ្ជ្រាបអំពីច្បាប់ចរាចរណ៍ ដល់ពួកគេ។
លោកស្រី មីន មាណវី បានបញ្ជាក់ដូច្នេះ កាលពីថ្ងៃទី២២ ខែកញ្ញា ឆ្នាំ២០២២ នៅបរិវេណ វិទ្យាល័យហ៊ុន សែន ត្រសេកកោង ស្ថិតក្នុងឃុំថ្មី ស្រុកទឹកឈូ ខេត្តកំពត មានប្រារព្ធទិវា សុវត្ថិភាពចរាចរណ៍ និងការប្រកាស ចាប់ផ្តើមអនុវត្តសកម្មភាពសុវត្ថិភាពចរាចរណ៍ ដោយមានការចូលរួមពីគ្រប់អង្គភាពពាក់ព័ន្ធ និងសិស្សានុសិស្ស ជាច្រើនរយនាក់។
លោកស្រី មីន មាណវី បានបញ្ជាក់ទៀតថាៈ ជារៀងរាល់ឆ្នាំ អ្នកស្លាប់ដោយសារ គ្រោះថ្នាក់ចរាចរ នៅកម្ពុជា មានប្រមាណ ១២ ភាគរយ ជាសិស្ស និស្សិត ពោលគឺ ពាក់កណ្តាលនៃពួកគេ ជាសិស្សានុសិស្ស នៅកម្រិតអនុវិទ្យាល័យ និងវិទ្យាល័យ។
តាមរបាយការណ៍របស់អគ្គស្នងការដ្ឋាននរគបាលជាតិ គឺរយៈ៨ខែនៃឆ្នាំ២០២២នេះ មានករណីគ្រោះថ្នាក់ចរាចរ ចំនួន ២.០៥០ ករណី បណ្តាលឱ្យមនុស្សស្លាប់ ១.០៨២ នាក់។
លោកស្រី រដ្ឋលេខាធិការ បានបញ្ជាក់ថាៈ ក្នុងនោះ ជាយុវជន វ័យក្មេង អាយុចាប់ពី ១៥ ឆ្នាំ ដល់ ២៩ ឆ្នាំ ដែលភាគច្រើន ជាសិស្សសាលា។ ដូច្នេះ លោកគ្រូអ្នកគ្រូ នៅតាមសាលារៀន ទាំងអស់ ត្រូវបញ្ជ្រាបច្បាប់ចរាចរណ៍ ដល់សិស្សានុសិស្ស ឱ្យបានយល់ដឹង ដើម្បីកាត់បន្ថយ ករណីគ្រោះថ្នាក់ មកនៅកម្រិតអប្បបរមា។
លោក ខៀវ រិទ្ធិភ័ណ្ឌ អភិបាលរងខេត្តកំព បានមានប្រសាសន៍ថាៈ គ្រោះថ្នាក់ចរាចរក្នុង ខេត្តកំពត តែងកើតមានឡើង ជាញឹកញយ ពិសេសនៅលើកំណាត់ផ្លូវជាតិលេខ៣ ផ្លូវជាតិលេខ៣១ ផ្លូវជាតិលេខ៣៣ និងផ្លូវជាតិ៤១។
លោកអភិបាលរងខេត្ត បានបញ្ជាក់ថាៈ ក្នុងរយៈពេល ៩ខែ នៃឆ្នាំ២០២២ នេះ គ្រោះថ្នាក់ចរាចរ បានកើតឡើង ចំនួន ៩៣ ករណី។ ក្នុងនោះ មានការថយចុះ ៣៥ លើក បើប្រៀបធៀបនឹងរយៈពេលដូចគ្នា នៃឆ្នាំ២០២១៕ V / N