ដោយៈ គ្រញូង / បាត់ដំបងៈ ថ្នាក់ដឹកនាំខណ្ឌរដ្ឋបាលជលផល ខេត្តបាត់ដំបង បានឲ្យដឹងថាៈ ក្នុងខែវិច្ឆិកា ឆ្នាំ២០២០ កម្លាំងសមត្ថកិច្ចចម្រុះ មានអាជ្ញាធរដែនដី ប៉ូលិស ប៉េអឹម យោធាសឹករងស្រុក សហគមន៍នេសាទ បានសហការគ្នា ចុះបង្ក្រាបបទល្មើសនេសាទ បានចំនួន ១០ ករណី ព្រមទាំងដកហូតវត្ថុតាងបទល្មើស
មួយចំនួន ដូចជា សាច់មង ចំនួន ១១.៧៥០ ម៉ែត្រ បង្គោល ចំនួន ៧.៨០០ ដើម ឡុក ៦១ គ្រឿង និងលែងត្រីចម្រុះ ចំនួន ៣៧០ គីឡូក្រាម ចូលទៅបឹងធម្មជាតិវិញ។
លោក ជួង សុភា នាយខណ្ឌរដ្ឋបាលជលផល បានឲ្យដឹងថាៈ នៅក្នុងរដូវទឹកសម្រកនេះ ដោយសារស្ថានភាព នៅក្នុងស្រុកឯកភ្នំ និងស្រុកមោងឫស្សី មានសភាពស្មុគ្រស្មាញ និងពិបាកដឹកជញ្ជូន ឧបករណ៍ល្មើសច្បាប់ យកមករក្សាទុក នៅខណ្ឌរដ្ឋបាលជលផល ទើបសមត្ថកិច្ចចម្រុះ សម្រេចដុតកម្ទេចចោល ឧបករណ៍ទាំងនោះ នៅនឹងកន្លែង ដើម្បីជាការព្រមាន ដល់ជនខិលខូចផង ឲ្យរាងចាល លែងប្រព្រឹត្ត តទៅមុខទៀត។
លោកនាយខណ្ឌ បានបញ្ជាក់ថាៈ ក្នុងការចុះប្រតិបត្តិការម្តងៗ ជនខិលខូច ហាក់ដូចជាបានដឹង ពីសកម្មភាពរបស់យើងមុន ព្រោះពួកវាបានដាក់បណ្តាញ រាយការណ៍ប្រាប់បក្ខពួកវា ជាមុន តាមរយៈទូរស័ព្ទ ឬ អាយកូម ឲ្យបក្ខពួកវាដឹង ហើយនាំគ្នារត់គេចខ្លួនអស់ ទើបសមត្ថកិច្ខយើង ចាប់ពួកជនខិលខូចមិនបាន។
លោក ជួង សុភា បានបញ្ជាក់ទៀតថាៈ ក្នុងចំណោមបទល្មើស ទាំង ១០ ករណីនេះ រួមមាន ការប្រើឧបករណ៍នេសាទ ខុសពីការកំណត់ របស់រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ ទាំងចំនួន ១០ ករណី៕/V
សមត្ថកិច្ចចម្រុះ ចុះបង្ក្រាបបទល្មើសនេសាទ
សមត្ថកិច្ចចម្រុះ ចុះបង្ក្រាបបទល្មើសនេសាទ
សមត្ថកិច្ចចម្រុះ ដុតកម្ទេចចោលឧបករណ៍ល្មើសច្បាប់ 
សមត្ថកិច្ចចម្រុះ លែងត្រីចម្រុះ ចូលទៅបឹងធម្មជាតិវិញ 
សមត្ថកិច្ចចម្រុះ ចុះបង្ក្រាបបទល្មើសនេសាទ
